Шавкат Мирзиёев иш ўрни яратиш бўйича яхши натижа кўрсатмаган туман ва ташкилот раҳбарларини ишдан олди

Ўзбекистон Президенти Шавкат Мирзиёев раислигида 8 июль, чоршанба куни ўтказилган видеоселектор йиғилишида ҳудудларда тадбиркорликни ривожлантириш ҳамда бюджет тушумларини сўзсиз таъминлаш чора-тадбирлари муҳокама қилинди. Бу ҳақда Президент матбуот хизмати хабар берди.

Йиғилишда камбағалликни камайтириш бўйича олиб борилаётган ишларга ҳам тўхтаб ўтилди. Давлат раҳбари камида 257 минг нафар муҳтож оила вакилини ишга жойлаштириш, 37 мингта хонадонга оилавий тадбиркорлик дастурлари доирасида кредитлар ажратиш зарурлигини қайд этди.

Эҳтиёжманд аҳолини ишга жойлаштириш кўрсаткичи энг паст секторлар таъкидланар экан, уларнинг раҳбарларига жазо чоралари кўрилди.

Жумладан, Фарғона тумани ҳокими Носиров, Яккабоғ тумани прокурори Мустафоев, Ғузор ва Чортоқ туманлари ички ишлар бошқармалари бошлиқлари Раҳмонов ва Абдурайимов, Муборак тумани ва Қўқон шаҳар солиқ инспекциялари бошлиқлари Темиров ва Турдиқуловни эгаллаб турган лавозимларидан озод этиш бўйича топшириқлар берилди.

Шўрчи тумани ҳокими Худойберганов, Каттақўрғон, Косон ва Пайариқ туманлари ички ишлар бошқармалари бошлиқлари Отамуродов, Отақулов ва Шермуҳаммедов, Нарпай, Ғаллаорол туманлари ва Гулистон шаҳар солиқ инспекциялари бошлиқлари Деҳқонов, Мамаев ва Ражабовга нисбатан охирги огоҳлантириш сифатида «ҳайфсан» эълон қилиниши белгиланди.

Аввалроқ бандлик ва меҳнат муносабатлари вазири Нозим Ҳусанов коронавирус пандемияси даврида Ўзбекистонда ишсизлар сони қарийб 2 миллион кишига етганини маълум қилганди.