Максим Шацких ишлаётган «Ротор» клуби Россия Премьер Лигасида иштирок этишдан бош тортмоқчи

«Ротор» футбол клуби Россия Премьер Лигасида қатнашишдан бош тортиши мумкин. Бу ҳақда «Аргументи недели» нашри хабар тарқатди.

Таъкидланишича, мавсум якунларига кўра, Россия миллий футбол лигасида (ФНЛ) биринчи ўринни эгаллаган Волгоград клуби келаси мавсумда Россия Премьер Лигасида иштирок этишдан бош тортмоқчи. Бунинг сабаби молиявий муаммолар билан боғланмоқда.

Агар «Ротор» Премьер Лигада қатнашмаса, шунингдек, «Химки» клубининг ҳам ФНЛда қолишни истаётгани тасдиқланса, мавсум якунида РПЛни ҳеч қайси клуб тарк этмайди.

Аввалроқ «Ротор» ўзбекистонлик ҳимоячи Виталий Денисов билан ҳамкорликни тўхтатгани ҳақида хабар берилганди. Денисов клуб сафида 2 та ўйин ўтказганди.

Шунингдек, «Ротор» жамоасида ўзбекистонлик собиқ ҳужумчи Максим Шацких ёрдамчи мураббий сифатида фаолият юритади.