Австралияда 12 дақиқа ишлаётган кир машинасида қолиб кетган мушук тирик қолди

Австралияда Оскар лақабли мушук ишлаётган кир машина ичида 12 дақиқа қолиб кетишига қарамай тирик қолди, деб ёзади New York Post.

Икки ёшли мушукнинг эгаси Аманда Мередит кир ёйишга чиқиб кетган. Шу пайтда унинг турмуш ўртоғи кир машинага яна кир солган. Аёл мушукнинг миёвлашига ўхшаш товушни эшитди, бироқ бунга эътибор бермаган.

Ушбу овоз такрор эшитилганида Аманда мушугини излаган, бироқ топа олмаган. Жониворни орадан 10 дақиқа ўтгач кир машинаси ичидан топишган.

Аёлнинг айтишича, мушук панжалари билан кир машинаси ойнасига тирмашиб олиб, айланар ҳамда унга қараб турарди. Аманда кир машинанинг суви тўкилиб, эшик очилишини яна икки дақиқа кутган.

«Мушук ветеринария клиникасида 24 соатни ўтказди. У бироз жароҳатланган, шунинг учун муолажага муҳтож эди. Уйга қайтганидан сўнг мушук бир ҳафта тинмай ухлади, кейин ўзига келди» — дейди Аманда.

Аманданинг айтишича, Оскар ушбу воқеадан сўнг кир машинасидан қўрқмай қолган. У машина ичида кирлар айланишини тез-тез томоша қиладиган бўлди.