Самарқанднинг «Шердор» ва Навоийнинг «Иттифоқ Навоий» футбол клублари белгиланган талабларни бажармагани ҳамда қатнашчилик бадали ва бошқа тўловларни ўз вақтида тўламагани учун Профессионал футбол лигаси қатнашчилари сафидан чиқарилди. Бу ҳақида ташкилот расмий сайтида хабар берилди.
Мазкур қарор Профессионал футбол лигаси Ижроия қўмитасининг 2020 йил 30 июндаги 04-сонли йиғилиш баёнига асосан чиқарилган.
Таъкидланишича, «Шердор» футбол клуби 2018 йилда, «Иттифоқ Навоий» футбол клуби эса 2019 йилда Про-Лигада иштирок этиши учун шартли равишда қабул қилинган. Уларнинг шартли қабул қилинишига эса клуб раҳбарларининг талабларни бажариш юзасидан ЎзПФЛнинг ўша вақтдаги раҳбарларига (У вақтда ПФЛ директори Омон Ғофуров эди — таҳр.) берган ваъдаси сабаб бўлган.
Қайд этилишича, иккала клуб ҳам ўша ваъдаларни ҳалигача бажармаган. ПФЛ иккала клубга ҳам Биринчи Лигада эмас, балки Иккинчи Лигада иштирок этиши мумкинлигини тавсия қилган.
Шунингдек, ташкилот агар ушбу клуб футболчилари билан меҳнат шартномалари бекор қилинса ва ўша футболчилар ПФЛ тасарруфидаги мусобақаларда иштирок этувчи бошқа клублар билан шартнома имзоласа, уларнинг меҳнат шартномалари рўйхатдан ўтказиб берилишини маълум қилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)