Тачмурод Агамуродов: Захирадан тушаётган футболчилар ўйинни кучайтира олмаяпти. Улар жамоани кучсизлантирмоқда

Coca-Cola Суперлига 7-тури доирасида кечган «Локомотив» — «Қизилқум» учрашувидан (3:0) сўнг матбуот анжумани бўлиб ўтди.

Дастлаб меҳмонлар устози Тачмурод Агамуродов ўйин ҳақидаги фикрлари билан ўртоқлашди.

«Умуман олганда ўйин тенг курашлар остида ўтди. Биринчи бўлимда рақибга устунликка эришиши учун имконият бермадик. Афсуски, таркиб борасида бизда муаммолар бор. Захирадан тушаётган футболчилар ўйинни кучайтира олишмаяпти, аксинча, жамоани кучсизлантирмоқда. Баҳснинг якунида бўлган вазиятларни инобатга олмасак, ўйин дурангга мос эди. Ҳечқиси йўқ, ишлашда давом этамиз. «Локомотив»ни эса ғалаба билан табриклайман.

Бизга сифатли футболчилар етишмаяпти. Қўл остимиздаги футболчиларни ишлатяпмиз. Шу боисдан узоққа бора олмаяпмиз. Чунки бошдан баланд сакраб бўлмайди. Натижаларга эришиш учун шунга яраша футболчилар керак.

Жамоа тўртта ўйиндан буён гол ура олмаяпти? Қандай қилиб гол ура оламиз? Рухсатдан кейин атиги 7-8 кун машғулотларда қатнашдик. Менимча бундай ҳолат деярли барча клубларда бўлди. Аммо менинг футболчиларим жисмоний ва функсионал жиҳатдан етарлича тайёргарликка эриша олмади. Шунингдек, футболчиларга совуққонлик ва маҳорат ҳам етишмаяпти. Бу ерда бирор футболчини гапириб, уялтирмоқчи эмасман.

Август ойида жамоада катта ўзгаришлар бўлади. Камида 7-8 футболчи билан хайрлашамиз. Уларнинг ўрнига сифатли футболчилар оламиз. Ҳозирги ёмон ҳолатдан чиқиб олиш учун бизга кучли тайёргарликка эга футболчилар талаб қилинади», — дея Агамуродовнинг сўзларини келтирмоқда «Championat.asia».

Матбуот анжуманининг иккинчи қисмида «Локомотив» бош мураббийи Андрей Фёдоров қатнашди.

«Кетма-кет уч марта мағлуб бўлганимиздан кейин ҳафталик цикл ишлаб чиқдик. Машғулотлар давомида жамоанинг ўйини кучайганлиги ҳам сезилаётганди. Футболчиларнинг ҳам жисмоний томонлама, ҳам кайфияти яхшиланди. Умуман олганда кўплаб факторлар ижобий томонга ўзгарди. Бизга фақатгина голлар босим бериши мумкин эди. Ўша ютқазган ўйинларимизда урилмаган вазиятларни қўрқув билан эмас, балки, футболчиларнинг ўзларига бўлаётган ишончсизлигига боғласам бўлади. Балки бугун ҳам айрим вазиятларда шундай ҳолатлар юзага келгандир. Футболчиларга рақиб жарима майдончаси ичида максимум ишлаш кераклигини айтгандим. Биринчи бўлимда ҳам шогирдларим бир неча вазиятларни голга айлантира олмаган пайтда менда яна ўша ҳиссиётлар пайдо бўла бошлаганди.

Голдан кейин эса бироз хотиржам ўйнашни бошладик, елкадан тоғ ағдарилгандек бўлди. Мағлубиятлар футболчиларнинг ҳаракатларига, айниқса, тўп билан ҳаракат қилишда бироз ишонч бахш қилди. Жамоа ҳимояда тартибли ҳаракат қилди. Шу сабабли бугунги натижани адолатли деб айта оламан. Ўтган ўйинлардан кейин қўлни кўтариб таслим бўлмасдан, ишлашда давом этиб, жангда ғалабага эришгани учун футболчиларга раҳмат айтиб қоламан.

Авазбек Ўлмасалиев бугун у яхши ўйнади. Менимча у бугунгидан ҳам яхши ўйнай олади, айниқса, тактик томонлама тартибли ҳаракат қилмоқда. У билан бу борада ҳали гаплашиб оламиз. Аваз талаб қилинган ўйинни бизга кўрсата олди дея оламан. Марат Бикмаев навбатдаги ўйинга тайёр бўлиши керак», — дейди Фёдоров.

«Локомотив» ушбу ғалабадан кейин очколарини 9 тага етказиб олди ва 8-ўринга кўтарилди. «Қизилқум» (1) эса сўнгги поғонада бормоқда.