Тошкентда Кичик ҳалқа йўли (КҲАЙ)нинг Беруний кўчасидан Фаробий кўчасигача бўлган йўналишининг бир қисми 2 июлдан бошлаб 14 кунга ёпилади. Бу ҳақда пойтахт ҳокимлиги матбуот хизмати хабар бермоқда.
Қайд этилишича, бу Олмазор тумани КҲАЙ кўчасидаги магистрал иссиқлик тармоғини капитал таъмирлаш ишлари бошланиши билан боғлиқ. Таъмирлаш ишлари 2020—2021 йиллар куз-қиш мавсумига тайёргарлик кўриш дастури доирасида амалга оширилиб, 2 июлдан бошланади.
Билдирилишича, ушбу магистрал иссиқлик тармоғи 1986 йили қурилган бўлиб, иссиқлик тармоғининг капитал таъмирланаётган қисмида охирги 3 йил давомида 30 дан ортиқ авария ҳолатлари қайд этилди.
Таъмирлаш ишлари 14 кун давомида, аҳолига иссиқ сув таъминоти узилмаган тартибда амалга оширилади. Иш жараёнида КҲАЙ кўчасининг Беруний кўчасидан Фаробий кўчасигача бўлган йўналиши қисман ёпилади ва автотранспорт воситалари қатнови КҲАЙ кўчасининг Фаробий кўчасидан Беруний кўчасигача бўлган томонида кўчани иккига бўлган ҳолда амалга оширилади.
«Шу муносабат билан ҳайдовчилардан юзага келиши мумкин бўлган тирбандликларнинг олдини олиш мақсадида айланма йўллардан фойдаланишларини тавсия этамиз», — дейилади хабарда.
Изоҳ (0)