ИИВ Андижонда ИИБ ходимлари қийноқларидан вафот этган фуқаро иши юзасидан узр сўради

Халқаро пресс-клубнинг 1 июль куни бўлиб ўтган сессиясида Ички ишлар вазири матбуот котиби Шоҳрух Ғиёсов Андижонда қийноққа солинган фуқаро вафоти сабаб узр сўради. Бу ҳақда «Дарё» мухбири хабар бермоқда.

«Айрим ходимларимиз томонидан қилинган жиноятлар бизнинг оёғимизга кишан бўлиб турибди. Мен ўйлайманки, бу ҳолатни биз кўриб чиқамиз, ҳар бир айбдор одам жавобгарликка тортилади. Биз тизимни шаффоф қиламиз, шу хизматимиз билан узр сўраймиз ўзимиз ҳам. Лекин қандайдир бир айрим ходимларнинг номаъқул хатти-ҳаракати орқали бутун тизимга салбий баҳо бериш, менимча, нотўғри», — дейди Ғиёсов.

Матбуот котиби Андижон шаҳрида содир этилган мудҳиш воқеа тизим ходимлари томонидан содир этилган жиноят кечириб бўлмас ҳолат эканини, шунингдек, тизим шаънига тушган катта доғлигини алоҳида таъкидлаб ўтди: «Бундан кейин ҳар қанча ижобий саъй-ҳаракат қилмайлик, бу доғ бизнинг камчилигимиз ҳақида доим эслатиб туради».

Воқеа содир бўлганидан сўнг ИИБ ходимлари ҳибсга олингач, Андижон вилоят ИИБ, вилоят прокуратураси, Андижон вилоят ҳокимлиги вакиллари вафот этган фуқаронинг уйига бориб оиласига ҳамдардлик билдириб, узр сўрагани қайд этилди. Шунингдек, Абдукаримовнинг даволаниш жараёнида, вафотидан кейинги ҳолатларда ёрдам берилган.

«Уларнинг оиласи ОАВда эълон қилишни хоҳламаган, шунинг учун бу нарса эълон қилинмади. Ҳозирги пайтда, бундай олиб қаралса, ҳолатдан кейин тизим сифатида қанча кечирим сўралса ҳам кам. Бу оила кечиримни қабул қиладими, қилмайдими, бу ҳам катта масала. Биз ички ишлар ходимлари ўз хизматимиз, ишимиз билан натижани кўрсатамиз, кечирим сўраймиз» — деб қўшимча қилди матбуот котиби.

Эслатиб ўтамиз, 2020 йил 13 июнда Андижонда қийноққа солинган фуқаро вафоти сабаб 3 нафар ИИБ ходими ҳибсга олинган, воқеа 30 майда Андижон шаҳар Салоҳият кўчасида яшовчи фуқаро А.А. тан жароҳатлари билан касалхонага олиб келинишидан бошланган. Фуқаро 11 июнда вафот этган. 14 июнь куни Андижон вилояти Андижон шаҳар бўйича ички ишлар органлари (ИИО) фаолиятини мувофиқлаштириш бошқармаси (ФМБ) бошлиғи подполковник Содиқ Усмонов мазкур воқеа сабаб ишдан олинди. Кейинроқ ИИБда беш киши ишдан олингани ва 19 киши жазолангани маълум қилинди. Бош прокуратура айни иш доирасида олиб борилаётган тергов ҳаракатлари давомида 27 июнь куни жиноятга алоқадор деб топилган яна икки киши — 4-сонли ИИБ бошлиғи подполковник П.Мамажонов ҳамда мазкур бўлим жиноят-қидирув гуруҳининг яна бир тезкор вакили ҳам қамоққа олинганини маълум қилган.