Футбол бўйича Ўзбекистон чемпионати 5-тури доирасида ўтган «Пахтакор» — «Бунёдкор» учрашувидан (5:0) сўнг ҳар икки жамоа бош мураббийлари иштирокида матбуот анжумани бўлиб ўтди.
Дастлаб меҳмонлар устози Вадим Абрамов ўйин ҳақидаги фикрлари билан ўртоқлашди.
«Нима ҳам дер эдим, «Пахтакор»ни ғалаба билан табриклайман! Фикримча, ҳисоб ўйинга мос эмас. Афсуски, футболда баъзида шундай бўлиб туради. Айтишим мумкин, бугун «Пахтакор»нинг дарвозамиз томон йўллаган барча зарбаси голга айланди. Биринчи дақиқадаёқ гол ўтказиб юборган бўлсакда, ўйинни боришини ўзимиз томонга ўзгартира олгандик, бироқ гол ура олмадик. Аксинча, 40-дақиқадан кейин нималардир бўлди ва ҳисоб йириклашиб кетди.
Рақиб дарвозаси олдида юзага келтираётган вазиятларимиздан фойдаланишимиз керак. Бизда акси бўляпти. Ёш болалардек хатоларга йўл қўйяпмиз. Икки ҳужумчимиз дарвозага яқинлашса-ю, вазиятни ижобий якунлаш ўрнига тўпни оёққа мослаштира олмасак? Назаримда бу маҳорат билан боғлиқ. «Пахтакор»да эса «класс»и юқори даражадаги ўйинчилар кўп», — дейди Абрамов.
Матбуот анжуманининг иккинчи қисмида «шерлар» бош мураббийи Шота Арвеладзе қатнашди.
«Жиззахдаги ўйин билан таққослаганда бугун кўпроқ футбол ўйнадик. Бу «Бунёдкор»ни футбол ўйнашни хуш кўрадиган жамоа эканлигидан далолат. Аслида ёмон ўйнайсанми яхшими, футбол ўйнашга ҳаракат қилиш керак. Бугунги ғалаба ўтган турдаги мағлубиятдан кейин жуда керак эди. Илк дақиқада гол урдик. 1:0 ҳисоби вақтида Элдор Суюнов жамоани голдан қутқарди. Олдинги мағлубиятдан кейин яхши ўйнадик», — деди грузиялик мутахассис.
«Пахтакор» мазкур ғалабадан кейин 12 очко тўплаган ҳолда, биринчи ўринга кўтарилиб олган бўлса, «Бунёдкор»нинг очколари (9) ўзгаришсиз қолди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)