Футбол бўйича Ўзбекистон Суперлигаси 5-туридан ўрин олган «Қўқон-1912» ҳамда «Қизилқум» жамоалари ўртасидаги ўйиндан (4:0) сўнг меҳмонлар устози Тачмурод Агамуродов учрашув ҳақидаги ўз фикрларини билдириб ўтди.
«Шогирдларим бир ярим тайм яхши ўйнашди. Афсуски, биринчи голдан кейин ҳаммаси ўзгариб кетди. Захирадан майдонга тушган футболчилар ўйинни кучайтириши керак эди. Аммо ундай бўлмади.
Уч дақиқада уч гол ўтказиб юборишни тушуниш қийин. Жамоанинг бунга ҳаққи йўқ эди. 1:0 ҳисобида мағлубиятга учраётганингда , ҳисобни тенглаштириш учун имконият бўлади, биз эса аксинча 3 та гол ўтказиб юбордик. Бугун ҳар томонлама рақибга ютқазиб қўйдик. «Қўқон-1912»ни бугунги ғалаба билан табриклайман», — дейди Агамуродов.
«Қўқон-1912» устози Бахтиёр Ашурматов эса ушбу ғалабани жамоа мухлисларига бағишлашини айтди:
«Бугунги учрашув асабий ва қийин тарзда кечди. Мураббий сифатида биринчи бўлимдаги ўйинимиздан кўнглим тўлмади. Ўйлаган режаларимиз амалга ошмади. Тажрибали мураббийлардан бири саналган Тачмурод Агамуродов яхши жамоа шакллантиргани кўриниб турибди. Улар биринчи таймда анча тартибли ўйин намойиш қилишди.
Рақиб жамоа аъзолари бизнинг қандай ҳужум уюштиришимизни, қандай ҳимоя қилишимизни олдиндан билган ҳолда ҳаракат қилди. Шунинг учун биринчи бўлимда қийналдик.
Ҳисоб ўйинга яраша бўлди дея олмайман. Фақат сўнгги дақиқаларда «Қизилқум» футболчилари қарши ҳужумга берилиб кетди ва биз бундан фойдаландик. Бугунги ўйин учун айниқса, иккинчи бўлимда ўйинимиз қовушмаётган пайтда ўзларида куч топиб, ўйинда бурулиш ясашгани учун шогирдларимга миннатдорчилик изҳор этаман. Биринчи бўлимда мухлислар етишмагани сезилиб турди. Уларнинг тезроқ майдонга қайтишларини истаймиз. Бугунги ғалабани мухлисларимизга бағишлаймиз».
Мазкур ғалабадан кейин қўқонликлар мусобақа жадвалида 3-ўринга кўтарилиб олди. Навоийликларнинг эса ҳамон омади юришмаяпти. Жамоа ўтказилган 5 та турда бор-йўғи 1 очко тўплаган.
Изоҳ (0)