Тошкент шаҳрида сўнгги икки ҳафтада аҳоли орасида аниқланган коронавирусга чалиниш ҳолатларининг 57 тасида вирусни юқтириш манбаси номаълум қолмоқда. Бу ҳақда Шавкат Мирзиёев раислигида 16 июнь, сешанба куни хизмат кўрсатиш ва ички туризм соҳаларини ривожлантириш масалалари бўйича ўтказилган видеоселектор йиғилишида маълум қилинди.

Фото: Президент матбуот хизмати

Тадбир аввалида давлат раҳбари коронавирус билан боғлиқ вазиятга тўхталиб, охирги пайтда мамлакатда бу касалликка чалинганлар сони ошгани, энг ёмони, аҳоли ўртасида ҳам кўплаб рўй бераётганига эътибор қаратди.

Жумладан, Тошкент шаҳрида сўнгги икки ҳафтада касалланган 551 нафар фуқародан 482 нафари айнан аҳоли орасидан аниқланган. 57 ҳолатда вирусни юқтириш манбаси номаълум қолмоқда. Тошкент, Навоий ва Қашқадарё вилоятларида ҳам шундай хавотирли ҳолат кузатилмоқда.

«Буларнинг барчаси коронавирус билан боғлиқ вазият тобора мураккаб тус олаётганини кўрсатиб турибди. Бугун пандемияга қарши курашишда ҳушёрлик ва масъулиятни ўн карра оширадиган янги босқич бошланмоқда, десак тўғри бўлади. Қанчалик қийин бўлмасин, бу босқичда карантин қоидаларига қатъий амал қилишимиз шарт. Ҳар бир ишимизни эҳтиёткорлик билан, оқибатини пухта ўйлаб, нафақат ўзимиз, балки оиламиз ва фарзандларимиз олдидаги масъулиятни чуқур ҳис этиб бажаришимиз керак. Акс ҳолда, барча саъй-ҳаракатларимиз йўққа чиқиши ҳеч гап эмас. Ишончим комил, анча билим ва тажриба орттирган, бағрикенг ва матонатли халқимиз бу босқичдан ҳам, албатта, муносиб ўтади», — деди Шавкат Мирзиёев.

Республика махсус комиссиясига ўз фаолиятини қайта бошлаётган корхона ва ташкилотлар, бозор ва савдо мажмуаларида дезинфекция ишлари ҳамда санитария назоратини кучайтириш, оммавий ахборот воситалари орқали аҳоли ва меҳнат жамоалари орасида тушунтириш ишларини кенгайтириш бўйича кўрсатмалар берилди. Аҳолига хизмат кўрсатадиган, улар билан бевосита мулоқотда бўладиган барча муассасалар ходимларини коронавирус бўйича мунтазам тестдан ўтказиш муҳимлиги таъкидланди.

Маълумот учун, аҳоли орасида коронавирусга чалиниш ҳолатлари сони 15 июнь куни 29 тани, 14 июнь куни 27 тани, 13 июнь куни 5 тани, 12 июнь куни 26 тани ташкил қилди. Ўзбекистонда пандемия бошидан буён касаллик аниқланиши бўйича энг юқори кунлик кўрсаткич 7 июнь куни қайд этилди, шу куни 237 кишида касаллик аниқланди.