Ижтимоий тармоқларда Нукус шаҳрида ички ишлар органи ходими ҳамда Миллий гвардия ҳарбий хизматчиси бир фуқарони мажбурлаб «Газель»га ортишга урингани тасвирланган видео тарқалгани ҳақида хабар берилганди. Ички ишлар вазирлиги мазкур ҳолат бўйича маълумот берди.
Маълум қилинишича, 14 июнь куни Нукус шаҳри ҳудудида аҳоли орасида карантин қоидаларига риоя этилишини назорат қилиш мақсадида Қорақалпоғистон телерадиокомпанияси, Санитария эпидемиологик назорати давлат инспекцияси Қорақалпоғистон Республикаси бўлими, Миллий Гвардия ҳамда Нукус шаҳар ИИО ФМБ ҳуқуқбузарликлар профилактикаси гуруҳи таянч пункти профилактика инспектори катта лейтенант Р.Бекимбетовдан иборат гуруҳ Нукус шаҳридаги автотураргоҳ атрофида текширув ишларини олиб борган.
Қайд этилишича, текширув вақтида 1997 йилда туғилган фуқаро У.М. тиббий ниқоб тақмасдан ва такси ҳайдовчилари учун белгиланган махсус комбинезон киймасдан, карантин қоидаларига амал қилмай фаолият олиб бораётганлиги аниқланган.
Вазирлик томонидан билдирилишича, ҳолат юзасидан Санитария эпидемиологик назорати давлат инспекцияси ходими суриштирув олиб бормоқчи бўлганда У.М. уларга фаол қаршилик кўрсатиб, ўзининг ҳаракатлари билан шу ерда бўлган бошқа шахсларнинг эътиборини жалб қилган. Айнан шу ҳолат видеотасвирда акс эттирилган.
Охир-оқибат вазият барқарорлаштирилиб, фуқарога нисбатан Маъмурий жавобгарлик тўғрисидаги кодекснинг тегишли моддалари билан баённома расмийлаштирилган.
Маълум қилинишича, ҳозирда Нукус шаҳар ИИО ФМБ ҳуқуқбузарликлар профилактикаси гуруҳи таянч пункти профилактика инспектори катта лейтенант Р.Бекимбетовнинг хатти-ҳаракатларига ҳуқуқий баҳо бериш юзасидан хизмат текшируви тайинланган.
Эслатиб ўтамиз, Андижон шаҳар ИИО ФМБ 4-сон ИИБ ходимлари фуқаро А.А.ни ИИБ маъмурий биносига олиб келиб, қийноққа солганлиги оқибатида фуқаро 11 июнь куни Республика шошилинч тез тиббий ёрдам маркази Андижон филиалида вафот этган. Мазкур ҳолат юзасидан Андижон шаҳар ИИО ФМБ 4-сон ИИБ ходимларига нисбатан Жиноят кодексининг 206-моддаси (Ҳокимият ёки мансаб ваколати доирасидан четга чиқиш) 1-қисми ва бошқа моддалари билан жиноят иши қўзғатилган ва 3 нафар ИИБ ходими ҳибсга олинди. Мазкур воқеа ортидан беш киши, шу жумладан, Андижон шаҳар ИИО ФМБ бошлиғи ишдан олинди, 19 киши жазоланди.
Мазкур ҳолат Инсон ҳуқуқлари бўйича Миллий маркази томонидан қораланди, «Юксалиш» умуммиллий ҳаракати ва депутатлар бу ҳолатга ўз муносабатларини билдирди.
Изоҳ (0)