Малайзия ҳукумати коронавирус пандемияси сабабли 2020 йилда мамлакат фуқаролари учун Ҳаж мавсумини бекор қилди ва уни номаълум муддатга қолдирди. Бу ҳақда Малайзия бош вазирининг офиси вазири Зулкифий Муҳаммад ал-Бакрий маълум қилди, деб ёзмоқда «РИА Новости».

Фото: «РИА Новости»

Маълум қилинишича, мазкур қарор Малайзия қироли султон Абдулла Риётуддин Мустафонинг розилиги билан қабул қилинган.

«Жорий йилда Ҳажни бекор қилиш қарори Соғлиқни сақлаш вазирлигининг дунёдаги ва Малайзиядаги эпидемиологик вазият ҳақидаги ҳисоботига асосланди. Қарор Ислом ишлари бўйича миллий кенгаш мажлисида 9 июнь куни қабул қилинди. Ҳаж 1441-ҳижрий йилда ташкил этилмайди», — дея маълум қилган ал-Бакирий.

«Бу жуда қийин қарор бўлди, чунки барчамиз Ҳаж мусулмон кишининг ҳаётида қанчалик муҳим эканлигини биламиз», — деди вазир.

Индонезия ҳукумати ҳам жорий йилдаги Ҳаж мавсумини бекор қилди. Мазкур мамлакат учун Ҳаж зиёратига ажратилган квота 221 минг кишини ташкил қилиб, жорий йил учун мазкур ўринларнинг 90 фоизи банд қилинганди.

Индонезияда Ҳаж мавсуми бекор қилинганини мамлакатнинг дин ишлари бўйича вазири Фахрул Розий маълум қилган. «Бу жуда қайғули ва оғир қарор, бироқ биз зиёрат вақтида зиёратчиларимиз ва ходимларимизнинг хавфсизлиги учун жавоб берамиз», — деди вазир.

Саудия Арабистони аввалроқ Умра зиёратини бекор қилган, бироқ Ҳаж зиёрати бўйича ҳали аниқ бир қарорга келгани йўқ.

Вазир Розийнинг сўзларига кўра, май ойида Индонезия президент Жоко Видодо номидан Саудия Арабистони қиролидан Ҳаж бўйича қарор чиқаришни талаб қилган.

«Жакарта хавфни камайтириш учун дастлаб зиёратчиларнинг ярмига зиёратга боришга рухсат беришни режалаштирганди, бироқ кейин барча зиёратчиларни ўз уйида қолдиришга қарор қилди», — дея қўшимча қилган вазир.

Эслатиб ўтамиз, Маккадаги Ал-Ҳаром ва Мадинадаги Набавий масжидларида март ойининг охирида жамоат намозлари тўхтатилганди ва масжидлар Рамазон ойида ёпиқ ҳолда қолганди.