Футбол бўйича Ўзбекистон Суперлигасининг 4-туридан ўрин олган «Насаф» — «Навбаҳор» ўйинидан (2:2) сўнг ҳар иккала жамоа бош мураббийлари — Андрей Канчельскис ва Рўзиқул Бердиев учрашув ҳақидаги ҳақидаги фикрлари билан ўртоқлашди.
Дастлаб наманганликлар устози Андрей Канчельскис «Насаф»га қарши ўйин ҳақида шундай деди:
«Икки бор ҳисобда олдинда бора туриб, ғалабани қўлдан чиқариш жуда ҳам аламли. Пенальтини аниқ амалга оширганимизда, ишимиз бироз енгиллашар эди. Нима бўлганда ҳам йигитларга раҳмат айтаман. «Насаф» яхши шаклланган, иқтидорли футболчиларга эга бўлган жамоа саналади ва уларга қарши ўйнаш доим қийин бўлган.
Мавсум бошидан тақвим жуда оғир келган эди. «Пахтакор», «Андижон» ва «Насаф»га қарши сафар ўйинлари шулар жумласидан. Бу — футбол. Олдинга ҳаракатланишда, келгуси учрашувларга тайёргарлик кўришда, хатолар устида ишлашда давом этамиз».
«Насаф» бош мураббийи Рўзиқул Бердиев эса жамоасининг мусобақа жадвалида биринчи ўриндан муқим жой олишга ҳаракат қилиши ҳақида гапирди.
«3 ойлик танаффусдан сўнг бугун ҳар иккала жамоа ҳам шиддаткор, мазмунли ўйин кўрсатди. «Навбаҳор» қарши ҳужумда ўйнашини кутган эдик. Шунга қарамасдан, эътиборни йўқотдик ва иккита тўп ўтказиб юбордик.
Жамоа охирига қадар курашди. Жисмоний ва тактик жиҳатдан рақибдан устунлик қилдик. Жадвалда биринчи турсангиз, албатта бу нарса сизни хурсанд қилади. Ушбу ўриндан муқим жой олишга ҳаракат қиламиз», — дейди Бердиев.
Ушбу натижадан кейин «Насаф» очколари сонини 10 тага етказиб олиб, мусобақа жадвалида биринчи ўринга кўтарилиб олди. «Навбаҳор» эса 5 очко жамғарган ҳолда 7-поғонага кўтарилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)