Ўзбекистонда мактаб битирувчиларининг якуний давлат аттестацияси ва ОТМга кириш имтиҳонларини унификация қилиш ва ягона имтиҳонни йўлга қўйиш режалаштирилмоқда. Бу ҳақда Президентнинг «2020/2021-ўқув йилида Ўзбекистон Республикасининг олий таълим муассасаларига ўқишга қабул қилишнинг давлат буюртмаси параметрлари тўғрисида»ги қарорида қайд этилган.
Фото: «Дарё»
Ҳужжатда Давлат тест маркази ва Халқ таълими вазирлиги бошқа вазирлик ва идоралар билан биргаликда 2020 йил 1 сентябрга қадар умумтаълим муассасалари битирувчиларининг якуний давлат аттестацияси ҳамда олий таълим муассасаларига кириш имтиҳонларини унификация қилиш ва ягона имтиҳонни йўлга қўйиш бўйича таклифларни ишлаб чиқиши ва Президент Администрациясига киритиши белгиланган.
Шунингдек, 2021/2022-ўқув йилидан бошлаб кадрлар буюртмачиларининг эҳтиёжлари тўлиқ автоматлаштирилган тарзда «quota.mineconomy.uz» ахборот тизими орқали шакллантирилади.
Мавзуга доир: Андижонлик мактаб битирувчиларининг 190 нафари муддатидан аввал ОТМларга қабул қилинди
Эслатиб ўтамиз, карантин вақтида аҳолига имкон борича қўшимча қулайлик яратиш бўйича белгиланган вазифаларни амалга ошириш ҳамда кўпчилик ота-оналарнинг илтимосларини инобатга олиб, бу ўқув йили мактаблардаги якуний имтиҳонлар бекор қилинди.
Абитуриентлардан ҳужжатлар 20 июндан 20 июлгача (20 июль куни ҳам) қабул қилинади. Улар 5 тагача таълим йўналишини танлаши мумкин. Тест синови топшириладиган фанлар мажмуаси ҳамда фанлар кетма-кетлиги бир хил бўлган бештагача бакалавриат таълим йўналиши бўйича танловда иштирок этиш ҳуқуқи берилди. Хотин-қизларнинг ОТМга киришида қўшимча тўрт фоизли давлат гранти асосида квота ажратилади.
