O‘zbekistonda maktab bitiruvchilarining yakuniy davlat attestatsiyasi va OTMga kirish imtihonlarini unifikatsiya qilish va yagona imtihonni yo‘lga qo‘yish rejalashtirilmoqda. Bu haqda Prezidentning “2020/2021-o‘quv yilida O‘zbekiston Respublikasining oliy ta’lim muassasalariga o‘qishga qabul qilishning davlat buyurtmasi parametrlari to‘g‘risida”gi qarorida qayd etilgan.
Hujjatda Davlat test markazi va Xalq ta’limi vazirligi boshqa vazirlik va idoralar bilan birgalikda 2020-yil 1-sentabrga qadar umumta’lim muassasalari bitiruvchilarining yakuniy davlat attestatsiyasi hamda oliy ta’lim muassasalariga kirish imtihonlarini unifikatsiya qilish va yagona imtihonni yo‘lga qo‘yish bo‘yicha takliflarni ishlab chiqishi va Prezident Administratsiyasiga kiritishi belgilangan.
Shuningdek, 2021/2022-o‘quv yilidan boshlab kadrlar buyurtmachilarining ehtiyojlari to‘liq avtomatlashtirilgan tarzda “quota.mineconomy.uz” axborot tizimi orqali shakllantiriladi.
Mavzuga doir: Andijonlik maktab bitiruvchilarining 190 nafari muddatidan avval OTMlarga qabul qilindi
Abituriyentlardan hujjatlar 20-iyundan 20-iyulgacha (20-iyul kuni ham) qabul qilinadi. Ular 5 tagacha ta’lim yo‘nalishini tanlashi mumkin. Test sinovi topshiriladigan fanlar majmuasi hamda fanlar ketma-ketligi bir xil bo‘lgan beshtagacha bakalavriat ta’lim yo‘nalishi bo‘yicha tanlovda ishtirok etish huquqi berildi. Xotin-qizlarning OTMga kirishida qo‘shimcha to‘rt foizli davlat granti asosida kvota ajratiladi.
Izoh (0)