Ўзбекистонда сўнгги кунларда коронавирус инфекциясига чалинган беморларни даволаган тиббиёт ходимлари ва даволаниш курсини тугатган беморлар 14 кунлик реабилитация курсларисиз тўғридан-тўғри уйларига кузатила бошлангани ҳақида тарқалган маълумотлар юзасидан Соғлиқни сақлаш вазирлиги матбуот хизмати раҳбари Фурқат Санаев изоҳ берди.
Ўзбекистонда коронавирус қайд этилган илк бемор тузалганидан сўнг уни реабилитацияга кузатиш жараёни.
Фото: Соғлиқни сақлаш вазирлиги
«Ўзи тўлиқ даволанишдан кейин вирус организмдан батамом чиқиб кетганидан сўнг 14 кунлик реабилитация амалиёти фақат Ўзбекистонда эҳтиёт чораси сифатида қўлланди, холос. Ҳатто дунёнинг ривожланган давлатларида ҳам нафақат бу амалиёт, балки коронавирусга чалинганлар ҳам фақат оғир ҳолатлардагина шифохонага ётқизилади, қолган пайт керакли дори-дармонлар тавсия қилиниб, уйда даволаниш буюрилади.
Ўзбекистонда вирусга чалинган ҳар қандай бемор белгиланган муддатда жиддий кузатув остида тўлиқ бепул даволанади. Даволаниш сўнгида вирус бўйича текширувлар манфий натижа берганидан кейин ҳам бу намуналар пойтахтимиздаги СЭОМнинг махсус вирусология лабораторияларида қайта таҳлилдан ўтказилади ва фақат шундан кейингина узил-кесил ташхис қўйилади. Ана шундай такрорий чуқурлаштирилган текширувдан кейингина бемор тузалган ҳамда хавфсиз ҳисобланади», — деб ёзади ССВ матбуот хизмати раҳбари.
Фурқат Санаевнинг қайд этишича, ушбу беморларни даволаган тиббиёт ходимлари ҳам ана шундай такрорий текширув таҳлилларидан ўтади.
«Энди реабилитация амалиёти тўхтатилганига келсак, тажриба бу амалиётга зарурат йўқлигини кўрсатди. Чунки реабилитацияга вирусдан батамом халос бўлганлар жўнатиларди ва улар орасида касаллик қайталаниш ҳолати ҳам кузатилмади. Шундан кейин бу тажрибадан воз кечилди», — деб изоҳига якун ясади вазирлик матбуот хизмати раҳбари.
Маълумот учун, Ўзбекистонда коронавирусдан тузалганидан сўнг реабилитацияга кузатилган беморлар учун 2,8 миллион сўмдан пул сарфланаётган эди. 23 май ҳолатига кўра, реабилитацияга ўтказилган 2492 нафар бемор учун 6 миллиард 977 миллион сўм сарфлангани маълум қилинганди.
Эслатиб ўтамиз, Ўзбекистонда 15 июнь соат 17:00 ҳолатига кўра, коронавирусга чалинган беморлар сони 5154 нафарга, касалликдан даволанганлар сони эса 3996 нафарга етди.
