Ўзбекистон ОТМларига кириш учун 2020 йилда 7 тоифадаги 8694 нафар абитуриентга имтиёзли давлат гранти ажратилади

Ўзбекистон олий таълим муассасаларига 2020/2021-ўқув йили учун кириш имтиҳонларида 7 тоифадаги абитуриентлар учун имтиёзли шартларда давлат гранти тақдим этилади. Бу ҳақда бош вазир ўринбосари Беҳзод Мусаевга таяниб, «Kun.uz» хабар берди.

Бош вазир ўринбосарининг маълум қилишича, янги ўқув йилида имтиёзли шартларда давлат гранти асосида жами 8694 та ўрин ажратилмоқда. Ўтган йилда мазкур кўрсаткич қарийб 5 мингта бўлган.

2020/2021-ўқув йили учун кириш имтиҳонларида имтиёзлар қуйидаги 7 тоифадаги абитуриентлар учун тақдим этилади:

• ногиронлиги бўлган шахслар учун — 2799 та ўрин;
• ҳарбий қўмондонлик тавсияномаси бўлган шахслар — 1175 та ўрин;
• ҳарбийларнинг фарзандлари учун — 1175 та ўрин;
• ички ишлар органлари ходимларининг фарзандлари учун — 705 та ўрин;
• меҳрибонлик уйи тарбияланувчилари учун — 1400 та ўрин;
• ижтимоий кам таъминланган тоифадаги хотин-қизлар учун — 940 та ўрин;
• Сўх туманида яшовчи битирувчилар — 500 та ўрин.

Шунингдек, ҳарбий хизматчилар ва ички ишлар органлари ходимларининг фарзандлари учун бериладиган тавсияномалар бу йил ижодий ва касбий йўналиш учун ҳам амал қилади. Илгари бу тавсияномалар фақатгина тест асосидаги кириш имтиҳонлари учун амал қиларди.

Қайд этилишича, бакалавриат таълим йўналиши бўйича ўқишга қабул кўрсаткичи 2020 йилда 36 фоизга етказилади. 2019 йилда 108 915 та ўринга талабалар қабул қилинган бўлса, 2020 йил умумий квота 148 144 тага етказилди.

Эслатиб ўтамиз, Ўзбекистонда хотин-қизларнинг ОТМга киришида қўшимча тўрт фоизли давлат гранти асосида квота ажратилади.

Маълумот учун, Ўзбекистонда кейинги ўқув йилидан фақат давлат гранти квоталари белгиланади. Тўлов-контракт бўйича қабул квотасини ОТМлар мустақил белгилайди.