Ўзбекистонда ОТМга кириш имтиҳонларини 1 августдан бошлаш режалаштирилмоқда

Ўзбекистонда 2020 йилда олий ўқув юртларига кириш синовларини 1 августдан бошлаш режалаштирилмоқда. Бу ҳақда бош вазир ўринбосари Беҳзод Мусаев 15 июнь куни бўлиб ўтган брифингда маълум қилди, деб ёзмоқда «Kun.uz».

Беҳзод Мусаевнинг айтишича, 2020 йилдаги кириш имтиҳонлари 1 августдан бошлаб ўтказилиши режалаштирилмоқда. Унинг қайд этишича, ҳозирги пайтда қилинадиган энг муҳим иш абитуриентларни рўйхатдан ўтказиш, уларнинг ҳужжатларини ўрганиб чиқиш ва имтиҳонларни бошлаб олиш ҳисобланади.

Таъкидланишича, кириш имтиҳонлари бошланишининг аниқ санаси ҳақида кейинги брифингларда тўлиқ маълумот берилади.

Шунингдек, магистратура учун абитуриентлар ҳужжатлари «magistr.edu.uz» портали орқали фақат онлайн қабул қилинади. Ҳужжатларни қабул қилиш 1 июлдан 30 июлгача давом этади. Имтиҳонлар 3—15 август кунлари ўтказилади.

Беҳзод Мусаевнинг маълум қилишича, агар айрим ҳудудларда эпидемиологик вазият яхшиланмаса, ўша ҳудудда тест топшириш кунлари яна ортга сурилиши мумкин. «Мақсад тезгина тестларни ўтказиб олиб, 1 сентябрдан ўқишни бошлаш эмас. Асосий мақсад абитуриентларнинг саломатлигини хавф остига қолдирмаслик бўлади», — деди бош вазир ўринбосари.

Эслатиб ўтамиз, Ўзбекистон ОТМларининг тасдиқланган квоталарига кўра, 2020 йилда бакалавриатнинг кундузги таълим шаклига 103 575 нафар, сиртқи таълим шаклига 31 350 нафар, кечки таълим шаклига эса 5025 нафар талаба қабул қилинади. Магистратура босқичига эса 10 425 та квота берилган. Бакалавриат учун абитуриентлардан ҳужжатлар 20 июндан 20 июлгача (20 июль куни ҳам) ДТМ сайти ва Ягона интерактив давлат хизматлари портали орқали қабул қилинади. Бакалавриат учун кириш имтиҳонлари фақат иккита мутахассислик фанидан ўтказилади.