Президент Шавкат Мирзиёев Олмазор туманидаги NANO Medical Clinic кўп тармоқли шифохона фаолияти билан танишди, дея хабар бермоқда давлат раҳбарининг матбуот хизмати.
2019 йил декабрида ишга туширилган терапевтик бинода маслаҳат поликлиникаси, 35 ўринли стационар, ядро тиббиёти, гемодиализ ва терапия бўлимлари, лаборатория жойлашган. Ушбу комплекс чет эл лойиҳаси асосида барпо этилган.
Шавкат Мирзиёев бу қурилиш лойиҳасига алоҳида эътибор қаратди. Ҳар бир метр ердан оқилона фойдаланиб, ҳамма жиҳатлар ҳисобга олингани, бошқа объектларни лойиҳалаштиришда буни ўрганиш кераклигини таъкидлади.
Мавзуга доир:
- «Ўзим ҳам 15 йил ижарада яшаганман». Шавкат Мирзиёев Олмазордаги олимлар мавзесида бўлди
- Шавкат Мирзиёев: Ўзбекистон юқори технологик соҳалар бўйича дунёдан ортда қолиб кетган
- Шавкат Мирзиёев Инновацион ривожланиш вазирлигининг янги биносини бориб кўрди
- Шавкат Мирзиёев Математика институтининг янги қурилган биносини бориб кўрди
Шифо маскани рақамли рентген, компьютер томографияси, суяк денситометри, юрак дефибриллятори каби илғор диагностика ускуналари билан жиҳозланган. Бу ерда 15 нафар олий тоифали шифокор фаолият олиб бормоқда.
Муҳим жиҳати, клиникада радионуклид текширувига асосланган ядро тиббиёти ва интервенсион радиология жорий қилинган. Бу турли эндокрин ва онкологик касалликларни аниқлаш ва даволашда катта самара беради.
Ушбу йўналишлар Атом энергетикаси бўйича халқаро агентлик (МАГАТЭ) назоратида ташкил этилган. Бундан ташқари, Германия, Туркия, Россиядаги етакчи тиббий марказлар билан ҳамкорлик йўлга қўйилган.
Клиникада суяк тўқимасининг минерал зичлигини аниқлашнинг диагностик усули ҳам муваффақиятли қўлланилмоқда.
Бугунги кунда лойиҳанинг иккинчи босқичи доирасида уч қаватли жарроҳлик биноси қурилмоқда. Бу аҳолига жаҳон стандартлари даражасида тиббий хизмат кўрсатиш ва яна 60 та янги иш ўрни ташкил этиш имконини беради.
Шу ерда Президент Шавкат Мирзиёевга хусусий тиббиёт тизимида амалга оширилаётган ишлар ҳақида маълумот берилди.
Президентининг 2017 йил 1 апрелдаги «Соғлиқни сақлаш соҳасида хусусий секторни янада ривожлантириш чора-тадбирлари тўғрисида»ги ҳамда ўша йил 29 декабрдаги «Хусусий тиббиёт ташкилотларини янада ривожлантириш бўйича қўшимча шарт-шароитларни яратиш тўғрисида»ги қарорлари бу борадаги имкониятларни кенгайтирди.
Мисол учун, хусусий клиникалар шуғулланиши мумкин бўлган ихтисосликлар 50 тадан 129 тага кўпайтирилди. 2022 йил 1 январгача солиқ ва божхона тўловлари бўйича имтиёзлар берилди. Натижада 2017 йилда хусусий тиббиёт муассасалари 3454 тани ташкил қилган бўлса, 2020 йил 1 июнь ҳолатига кўра, 5612 тага етган. 11 мингдан ортиқ иш ўрни яратилган.
Ҳудудларда замонавий клиникалар ташкил этиб, тиббий хизматлар бўйича рақобатни, пировардида сифатни таъминлаш, аҳоли саломатлигини мустаҳкамлаш юзасидан кўрсатмалар берилди.
Изоҳ (0)