Андижон вилоятининг Избоскан туманида фуқароларни Польшага ишга жўнатишни ваъда қилиб, пулларини фирибгарлик йўли билан ўзлаштирган корхона фаолиятига чек қўйилди. Бу ҳақда «Дарё»га Бош прокуратура матбуот хизмати хабар берди.
Департаментнинг Избоскан туман бўлими томонидан фуқаролар У.К. ва М.А.нинг мурожаатига асосан терговга қадар текширув ўтказилган. Текширув давомида фуқаро А.Т. ва бошқалар ноқонуний даромад орттириш мақсадида Legal help servis МЧЖ ташкил этиб, бир неча фуқароларни алдаб, ишончига кириб, уларни Польша давлатига 4 ой муддатда ишга юборишини айтиб, 5150 доллар ва 12,6 миллион сўмини фирибгарлик йўли билан қўлга киритгани аниқланган.
Ҳолат юзасидан А.Т. ва бошқаларга нисбатан Жиноят кодексининг 168-моддаси (Фирибгарлик) 2-қисми билан жиноят иши қўзғатилиб, тергов ҳаракатлари ўтказилмоқда.
Маълум бўлишича, Бандлик ва меҳнат муносабатлари вазирлиги сайтидаги хусусий бандлик агентликлари реестрида Legal help servis МЧЖ номи қайд этилмаган. Қонун талабига кўра, хорижий давлатларда иш билан таъминлаш фаолияти билан шуғулланиш учун махсус лицензия талаб этилади.
Аввалроқ Ўзбекистонда хусусий бандлик агентликлари тўғрисидаги қонунга ўзгартириш киритилиши ҳақида хабар берилган эди. Ўзбекистонда хусусий бандлик агентликлари тўғрисидаги қонун 2018 йил октябрь ойида кучга кирган.
Хусусий бандлик агентликлари муаммоси 2019 йил декабрида Олий Мажлис Сенатида қизғин баҳс-мунозараларга сабаб бўлганди. Хусусан, сенатор Фаррух Дадахўжаев мигрантларнинг маблағларини ҳимоя қилиш механизми йўқлиги учун Бандлик ва меҳнат муносабатлари вазирлигини танқид қилиб, агентликлар билан банк ҳисоб-китобларини аккредитив асосда олиб боришни таклиф қилган эди.
Ўз навбатида, Бандлик ва меҳнат муносабатлари вазирлиги қонунга ўзбекистонликларни хорижда ишга жойлаштириш бўйича виждонсиз хизмат кўрсатилишидан ҳимоя қила оладиган тузатишларни киритиш ниятини билдирган.
Изоҳ (0)