Қорақалпоғистон Республикаси Хўжайли туманидаги Санитария-эпидемиология осойишталик марказини таъмирлаш ишлари жараёнида 189,2 миллион сўм маблағ талон-торож қилингани аниқланди. Бу ҳақда Бош прокуратура «Дарё»га маълум қилди.
Мазкур ҳолат Бош прокуратура ҳузуридаги Иқтисодий жиноятларга қарши кураш департаментнинг Хўжайли тумани бўлими томонидан ўтказилган терговга қадар текширувда аниқланган.
Маълум бўлишича, «Т.» МЧЖ томонидан Хўжайли тумани Санитария-эпидемиология осойишталик марказида амалга оширилган жорий таъмирлаш ишларида ушбу корхона ва марказ мансабдор шахслари амалда қурилмаган 127,7 миллион сўмлик гараж, 52,5 миллион сўмлик ҳожатхона ва бошқа бажарилмаган қурилиш ишларини ҳужжатларга сохта маълумотлар киритиш орқали киритган. Шу тариқа, жами 189,2 миллион сўм бюджет маблағлари растрата қилиш йўли билан талон-торож қилинган.
Мазкур ҳолат юзасидан Жиноят кодексининг 167-моддаси 3-қисми, 228 ва 209-моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)