«Барселона» ҳужумкор ярим ҳимоячи Ансу Фатини «Манчестер Юнайтед»га 100 миллион еврога сотишдан бош тортди. Бу ҳақда Diario Sport хабар бермоқда.
Бир неча ҳафта олдин агент Жорже Мендеш каталон клубига мурожаат қилиб, 17 ёшли футболчининг нархини сўраган. «Барселона» эса Фатининг сотилмаслигини айтган ҳолда ўйинчининг товон пули миқдори 170 миллион евро эканини маълум қилган.
Бир неча кун олдин эса Мендеш «Барселона»га Фатини 100 миллион еврога сотиб олиш таклифи билан чиққан. Премьер Лиганинг бир нечта клублари ярим ҳимоячига қизиқиш билдирганди, аммо фақатгина «Манчестер Юнайтед» агент томонидан маълум қилинган миқдорни тўлашга тайёрлигини билдирган.
Бундай йирик таклиф «Барселона» раҳбариятини йиғилиш ўтказишга мажбур қилди. Унда Каталония клуби президенти Хосеп Бартомеу Фатини сотмаслик ҳақида қарор қабул қилди.
Шундан сўнг «Барселона» Мендешга Фатининг трансфери борасидаги таклифларни қабул қилмаслигини маълум қилган.
Маълумот учун, Фати ушбу мавсумда Ла Лигада дебют қилди ва 16 ўйин ўтказиб, ўз ҳисобига 4 та гол ёздириб қўйди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)