Ўзбек спорти журналистикаси асосчиларидан бири Ахбор Имомхўжаевга 8 июнь, душанба куни Турон фанлар академиясининг академиги унвони берилди.
Ўрта Осиё халқлари тарихи институти Турон фанлар академияси Президиумининг қарори билан Ахбор Имомхўжаев академиянинг ҳақиқий аъзоси деб қабул қилинди ва академик илмий унвони билан тақдирланди. Унвон ва бу ҳақидаги ҳужжатларни отахонга Турон фанлар академияси президенти Ҳайдарбек Бобобеков топширди.
Ахбор Имомхўжаев дастлаб футбол шарҳловчиси сифатида элга танилган. Нафақа ёшига етиб бўш вақти кўпайгач эса, китоб ёзиш унинг асосий вазифасига айланган. Имомхўжаев муаллифлигида жами 10 та асар (улардан 6 таси ўқув қўлланмалар) дунё юзини кўрган бўлса, энг сўнгги ва ҳажми бўйича энг каттаси ҳисобланмиш «Аср футболидаги асл қадрдонларим» китоби ўзбек футболининг 100 йиллигини қамраган ҳолда, ўзбек футболи энциклопедияси сифатида ҳам таърифланган. 12 йил давомида тўпланган маълумотлар асосида битилган бу китоб зиёлилар ва арбоблар томонидан ҳам эътироф этилган.
2020 йил бошида, Ахбор Имомхўжаев 84 ёшга тўлиши арафасида Ўзбекистон Давлат жисмоний тарбия ва спорт университети кенгаши қарорига биноан университетнинг Фахрий профессори унвони берилган эди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)