Бугун,

  • USD 11095.31
  • RUB 173.84
  • EUR 10772.44

2019/20 йилги мавсум Федерико Вальверде учун унутилмас бўлади. Испанияга келганига тўрт йил бўлган «митти қушча» ниҳоят дунёнинг энг рақобатбардош жамоаларидан бирида ўз ўрнига эга бўлди.

Фото: Getty Images

Фото: Getty Images

Зинедин Зидан аввалги касбдошлари Хулен Лопетеги ва Сантьяго Соларидан фарқли ўлароқ, 21 ёшли футболчига имконият тақдим этди. Ўз навбатида Феде ҳам франциялик мутахассис қўл остида муваффақиятли ҳаракат қила олди. Лопетеги даврида футболчи бор йўғи 36 дақиқа ўйнади, Solaри эса уни 17 ўйинда майдонга туширган бўлса-да, уларнинг бештасигина асосий таркибда бўлганди.

2019 йилнинг ёзида «Манчестер Юнайтед» етакчиси Поль Погбанинг «Реал» ўтиши борасида янгиликлар ҳар бир ОАВнинг асосий мавзусига айланганди. Охир-оқибат Мадрид клуби инглизлар билан келиша олмади ва Погба мавзусини камида январгача қолдиришга мажбур бўлди. Бироқ мавсум бошланиши билан Зидан ватандошининг ўринини боса оладиган вундеркиндни ўзи учун кашф қилди. Федерико Вальверде 2017/18 йилги мавсумни «Депортиво» сафида ижарада ўтказган ва ўша ердаёқ ўзини намойиш қила олганди. 2018/19 йилги мавсумда уругвайлик иқтидор эгаси озми, кўпми «Реал» ўйинларида кўриниш берди. Айниқса мавсум охирига бориб ўз ўйинига қўша олди.

Аммо футболчининг жорий мавсумдаги «чақнаш»и шунчалар ажойиб бўлдики, эндиликда Феде Ла Лигада навбатдаги муваффақиятни қўлга киритишга интилаётган «Реал»нинг асосий қуроли ҳисобланган чизиқнинг муҳим фигураси ҳисобланади.

Фото: Getty Images

Фото: Getty Images

«Реал» ушбу мавсумдаги илк совринини қўлга киритган баҳсда Вальверде «қаймоқранглилар»нинг ажралмас бўлаги эканини кўрсатди. Испания Суперкубоги учун кечган ўйинда Феде қўшимча бўлимларнинг сўнгги дақиқаларида дарвозабон билан бирга-бир вазиятга чиқиб кетаётган Альваро Моратани тўхтатиб қолди ва жамоасига совринни олиб келди. Мазкур ўйинда уругвайлик 15 марта дриблинг ишлатишга уринди ва уларнинг ўнтасини муваффақиятли бажариб, бу борада учрашувда энг яхши натижа қайд этган футболчига айланди.

Вальверде — ажойиб футболчи. Унинг Моратага нисбатан ишлатган қўполлиги «митти қушча»да ҳақиқий уругвайча руҳ борлиги исботлади: таслим бўлмаслик, ғалаба учун барчасига тайёр бўлиш.

Федерико мавсум давомида ҳам мухлислар ва мутахассисларни ажаблантиришда давом этди. Каземиро, Тони Кроос ва Лука Модрич каби «наҳанглар» ҳаракат қиладиган чизиқнинг алмаштириб бўлмас вакилига айланди. У шунчалик ишончли футболчига айланди-ки, 2014 йилдан буён Мадрид клуби марказий ҳимоя чизиғининг ажралмас жуфтлиги бўлиб келаётган Кроос—Модрич дуэтини парчалашга муваффақ бўлди.

21 ёшли Вальверде Примеранинг ортда қолган 27 тури давомида, фақат бешта ўйинда иштирок этмади. Булар ҳам муҳим учрашувлар олдидан ротациядан қўрқмайдиган Зиданнинг қарорлари эвазига, ўртамиёна жамоаларга қарши баҳслар эди.

Фото: «Реал»

Фото: «Реал»

Ла Лига рестартига тобора яқин қолмоқда. «Реал» карантиндан кейинги илк ўйини ўз уйида, 14 июнь куни «Эйбар»га қарши ўтказади. Ҳаммаси аён, мадридликлар пешқадам «Барселона» билан орадаги икки очколик фарқни йўққа чиқариш учун ўзига бўлган катта ишонч билан мавсумнинг қайта бошланишини кутмоқда.

Қизиғи, Вальверде асосий таркибда майдонга тушган баҳсларда «Реал» жорий мавсум фақат бир ўйинда ютқазди — бу Европа Чемпионлар Лигаси 1/16 финали доирасидаги «Манчестер Сити»га қарши кечган илк баҳс (1:2).

Кейинги бир неча ҳафта Вальверде учун ҳам жуда муҳим. Бу уругвайлик футболчи учун элитадаги илк катта мавсумнинг идеал якунига айланади. «Митти қушча»нинг Ла Лига ғолиблигини қўлга киритиши эса буюк «Реал»даги улкан парвознинг мукаммал бошланиши бўлади.

Marca материали асосида Нодирхон Ҳамидхонов тайёрлади

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!

Изоҳ
Асосий янгиликлар
Маҳаллий
Фарғонада италиялик аёл ЙТҲ оқибатида вафот этди
Маҳаллий
Жаҳон банки прогнози: Ўзбекистон кейинги икки йилда Европа ва Марказий Осиё минтақасидаги энг яхши иқтисодий ўсишга эга бўлади
Шоу-бизнес
Қирол Абдулла II ва қиролича Рания бахтининг акс томони: Иордания қироллик оиласининг сирлари ва фожиалари