Тошкент вилояти Зангиота туманида 38 ёшли Х.Б. ҳамда 21 ёшли Б.Н. ўртасидаги жанжал бир одамнинг ўлимига сабаб бўлди. Бу ҳақда ИИВ Тергов департаменти хабар қилган.
Хабарга кўра 2020 йилнинг 30 май куни соат тахминан 12:00 да Зангиота тумани Бўзсув қўрғонида 38 ёшли Х.Б. 21 ёшли Б.Н. билан ўзаро оғзаки келишмовчилик оқибатида жанжаллашган. Кейинчалик Б.Н. уйдаги белкурак билан Х.Б. нинг юз ва оёқ қисмига бир неча марта уриб, унга тан жароҳати етказган.
Оқибатда Х.Б. олган тан жароҳатлари билан туман тез тиббий ёрдам бўлимига олиб борилган, шифокорлар томонидан кўрсатилган тиббий муолажага қарамай у ерда вафот этган.
Ҳодиса жойини кўздан кечириш жараёнида ҳовлини ер қисмидан қон доғлари, бир дона белкурак, бир дона оқ-кўк рангли қон доғлари бўлган эркаклар футболкаси топилган.
Мазкур ҳолат юзасидан Зангиота тумани ИИБ ҳузуридаги тергов бўлими томонидан Ўзбекистон Республикаси Жиноят кодексининг 104-моддаси 3-қисми «д» банди (Одам ўлимига олиб келган қасддан баданга оғир тан жароҳати етказиш) билан жиноят иши қўзғатилиб, Б.Н. гумон қилинувчи тариқасида процессуал тартибда ушланган. Ҳозирда дастлабки тергов ҳаракатлари олиб борилмоқда.
104-модданинг 3-қисми «д» бандидаги жиноятни содир этган фуқарога 10 йилдан 12 йилгача озодликдан маҳрум қилиш жазоси тайинланиши мумкин.
Изоҳ (0)