Ўзбекистон бош давлат санитария инспектори Нурмат Отабеков 1 июнь, душанба куни бўлиб ўтган брифингда мамлакатнинг «яшил» ҳудудларида ўқув марказлари ўз ишини қайта бошлаши мумкин ёки йўқлигига аниқлик киритди.
Нурмат Отабековнинг маълум қилишича, карантин чоралари енгиллаганига қарамай, барча турдаги таълим муассасалари ва ўқув курслари фаолиятига қўйилган чекловлар ўз кучида қолади. «Яшил» ҳудудларда ўқув марказлари ўз ишини қайта бошлаши мумкин эмас.
Унинг сўзларига кўра, карантин вақтида ишлаб чиқариш жараёни санитария-эпидемиология назорати ходимлари томонидан текширилиши мумкин. Бунда нафақат ишлаб чиқариш, балки барча тадбиркорлик субъектларида уларни хабардор этган ҳолда текширишлар ўтказилиши мумкин.
Текширувларда бош давлат санитария шифокори томонидан карантин даврида вақтинчалик тасдиқланган санитария қоида ва меъёрлари ва Республика махсус комиссияси қарорларининг ижроси ўрганилади.
Бош давлат санитария инспекторининг билдиришича, касаллик аниқланмаган ҳудудларда карантинни бекор қилиб бўлмайди, чунки вазият тез ўзгариши мумкин. «Буни ‘яшил’дан ‘қизил’га айланган ҳудудлар мисолида ҳам кўриш мумкин», — дея таъкидлади Нурмат Отабеков.
Аввалроқ Республика махсус комиссиясининг давлат ва нодавлат таълим ташкилотларида таълим жараёнларини давом эттириш бўйича тегишли қарори қабул қилингандан сўнг ўқув марказларида таълим жараёнларини ташкил этиш мумкин бўлиши ҳақида хабар берилганди.
Эслатиб ўтамиз, Республика махсус комиссиясининг қарори билан амалдаги карантин талаблари 2020 йил 15 июнга қадар узайтирилди. Мазкур қарорга кўра, мамлакатнинг барча ҳудудларида уларнинг тоифасидан қатъи назар таълим ташкилотлари (боғча, мактаб, лицей, коллеж, техникум, институт, университет ва бошқалар), ўқув курслари фаолиятини йўлга қўйишга рухсат этилмайди.
Изоҳ (0)