Бугун,

  • USD 11014.01
  • RUB 191.8
  • EUR 10674.78

Ер ресурслари, геодезия, картография ва давлат кадастри давлат қўмитаси «Ўзбекистон Республикасидаги барча сув омборлари, йирик сув ҳавзалари ва гидроэлектр станцияларда сув захираларини ушлаб турувчи тўғонлар ва деворларнинг эрозияси натижасида келиб чиқиши мумкин бўлган фавқулодда вазиятларни прогнозлаш тўғрисида»ги Вазирлар Маҳкамаси қарори лойиҳаси муҳокамага қўйди.

Унга кўра, Ер ресурслари, геодезия, картография ва давлат кадастри давлат қўмитаси ҳузуридаги Давлат кадастрлари, геодезия ва картография миллий маркази Фавқулодда вазиятлар вазирлиги, Сув хўжалиги вазирлиги ва Энергетика вазирлиги ва Давлат геология ва минерал ресурслар қўмитаси билан биргаликда 2020 йил 1 октябрга қадар геодезик ўлчовлар, замонавий космик суратлар ҳамда улар ёрдамида тайёрланган ернинг рақамли баландлик маълумотларидан фойдаланган ҳолда республикадаги барча сув омборлари, йирик сув ҳавзалари, гидроэлектр станцияларида ва бошқа сув тошқини келиб чиқиши мумкин бўлган сув объектларининг сув сиғимидан келиб чиққан ҳолда олинадиган ҳисобий радиусдаги рельефли харитасини ишлаб чиқади ва тегишли идораларнинг ҳудудий бошқармаларига тақдим этилишини таъминлайди.

Ер ресурслари, геодезия, картография ва давлат кадастри давлат қўмитаси ҳузуридаги Давлат кадастрлари, геодезия ва картография миллий маркази Ахборот технологиялари ва коммуникацияларини ривожлантириш вазирлиги, Фавқулодда вазиятлар вазирлиги, Сув хўжалиги вазирлиги билан биргаликда 2020 йил 15 ноябрга қадар катта сиғимли сув объектларида тўғонлар ва деворларнинг эрозияси натижасида келиб чиқиши мумкин бўлган фавқулодда вазиятлар натижасида ўпириб чиқадиган сув оқимининг йўналиши ва шунга мос равишда сув остида қоладиган ер майдонларининг компьютер модулини ишлаб чиқади.

Шунингдек, Сув хўжалиги вазирлиги, Ер ресурслари, геодезия, картография ва давлат кадастри давлат қўмитаси, Давлат геология ва минерал ресурслар қўмитаси, «Ўзбекгидроэнерго» АЖ икки ой муддатда сув омборларидаги тўғонларни ва йирик гидротехник иншоотларни мустаҳкамлиги ва турғунлиги тўғрисида прогнозларни ишлаб чиқиш ва аниқлаш учун даврий равишда юқори аниқликдаги геодезик ва геологик кузатишлар олиб бориш режасини ишлаб чиқиши ва ўрнатилган тартибда тасдиқлаш учун Вазирлар Маҳкамасига киритилиши белгиланган.

Қарор ижросини таъминлашга қаратилган «Йўл харитаси» тасдиқланади. Қарорнинг бажарилишини назорат қилиш бош вазир ўринбсари Ўктам Барноев ва Ер ресурслари, геодезия, картография ва давлат кадастри давлат қўмитаси раиси Абдушукур Абдуллаев зиммасига юклатилади.

Маълумот учун, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Оқибатда Сардоба тумани Қўрғонтепа аҳоли яшаш пунктига сув кирган. Фавқулодда вазият туфайли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган, ҳодиса оқибатида камида 56 киши турли даражада тан жароҳати олган, тошқин зонасида қолиб кетган юзлаб одамлар қутқарилган.

Изоҳ
Асосий янгиликлар