Тошкентда 31 май куни коронавирус инфекциясидан даволанаётган уч нафар бемор аҳволи оғирлашгани боис реанимацияга олинди. Бу ҳақда Соғлиқни сақлаш вазирлиги матбуот хизмати хабар берди.
«Сўнгги соатларда Тошкент тиббиёт академияси кўп тармоқли клиникасида даволанаётган уч беморда ўткир нафас етишмовчилиги кузатилганлиги учун реанимация бўлимига олинган», — дейилади вазирликнинг 31 май соат 10:00 даги ахборотида.
Маълумот учун, 31 май соат 10:00 ҳолатига кўра Ўзбекистон касалхоналарида коронавирусга чалинган 757 нафар бемор даволанишни давом эттирмоқда. ССВ ахборотига кўра, улардан тўққиз нафарининг аҳволи оғир, бир нафарининг аҳволи эса ўта оғир.
Ҳозиргача Ўзбекистонда 3554 кишида коронавирус инфекцияси аниқланган бўлса, улардан 2783 нафари бутунлай соғайган, яна 14 нафари эса касаллик асоратлари оқибатида вафот этган.
