Qoraqalpog‘iston Respublikasida 2 nafar, Samarqand viloyatida 9 nafar va Toshkent shahrida 44 nafar, jami 55 nafar bemor 30-may kuni koronavirusdan butkul sog‘ayib, reabilitatsiyaga kuzatildi, deb xabar bermoqda SSV matbuot xizmati.

Qoraqalpog‘istonda tuzalganlarning 2 nafari ham erkak bo‘lib, 1 nafari Buxoro viloyatidan, yana 1 nafari esa Xorazm viloyatidan. Endilikda Qoraqalpog‘istonda shifo topganlar 129 nafarga yetib, davolanayotganlar 6 nafarni tashkil etmoqda. Ushbu hudud koronavirusdan xoli bo‘lishga juda yaqin turibdi.

Samarqandda tuzalganlarning barchasi ushbu viloyatdan (Samarqand shahri va Toyloq tumanidan 3 nafardan, Pastdarg‘om, Urgut va Oqdaryo tumanlaridan 1 nafardan). Ularning 7 nafari erkak, 2 nafari ayol bo‘lib, yoshi kattasi 52 yoshda, kichigi esa 25 yoshda. Viloyatda shu paytga qadar sog‘ayganlar 265 nafar bo‘lsa, endilikda 274 nafarga yetdi.

Toshkentdagi Virusologiya ilmiy-tekshirish instituti klinikasida tuzalganlarning 11 nafari erkak, 26 nafari ayol bo‘lib, yoshi kattasi 78 yoshli onaxon bo‘lsa, kichigi 2019-yil tug‘ilgan chaqaloq. Hududlar kesimida olinsa, Xorazm viloyatidan 9 nafar, Samarqand viloyatidan 7 nafar, Toshkent va Andijon viloyatlaridan 4 nafardan, Sirdaryo va Surxondaryo viloyatlaridan 3 nafardan, Toshkent shahridan 2 nafar, Buxoro, Farg‘ona, Navoiy, Qashqadaryo viloyatlari hamda Qozog‘iston Respublikasidan 1 nafardan.

Epidemiologiya, mikrobiologiya va yuqumli kasalliklar ilmiy-tekshirish instituti klinikasida tuzalganlarning barchasi erkak bo‘lib, yoshi kattasi 58 yoshda, kichigi 29 yoshda. Hududlar kesimida olinsa, Toshkent viloyatidan 2 nafar, Qoraqalpog‘iston Respublikasi, Xorazm, Namangan viloyatlari, Toshkent shahri hamda Qirg‘iziston Respublikasidan 1 nafardan.

Toshkent shahrida shu paytga qadar 1 019 nafar bemor sog‘aygan bo‘lsa, endilikda ular 1 063 nafarga yetdi.

Ayni paytda O‘zbekiston bo‘ylab koronavirus infeksiyasidan butkul sog‘ayganlar 2 783 nafarni tashkil qilmoqda.

Kasallanganlarning umumiy soni esa 3 523 nafarga yetdi. Mamlakatda hozirga qadar 14 kishi esa infeksiya asoratlari oqibatida vafot etgan.