Toshkentda 31-may kuni koronavirus infeksiyasidan davolanayotgan uch nafar bemor ahvoli og‘irlashgani bois reanimatsiyaga olindi. Bu haqda Sog‘liqni saqlash vazirligi matbuot xizmati xabar berdi.
“So‘nggi soatlarda Toshkent tibbiyot akademiyasi ko‘p tarmoqli klinikasida davolanayotgan uch bemorda o‘tkir nafas yetishmovchiligi kuzatilganligi uchun reanimatsiya bo‘limiga olingan”, — deyiladi vazirlikning 31-may soat 10:00 dagi axborotida.
Ma’lumot uchun, 31-may soat 10:00 holatiga ko‘ra O‘zbekiston kasalxonalarida koronavirusga chalingan 757 nafar bemor davolanishni davom ettirmoqda. SSV axborotiga ko‘ra, ulardan to‘qqiz nafarining ahvoli og‘ir, bir nafarining ahvoli esa o‘ta og‘ir.
Hozirgacha O‘zbekistonda 3554 kishida koronavirus infeksiyasi aniqlangan bo‘lsa, ulardan 2783 nafari butunlay sog‘aygan, yana 14 nafari esa kasallik asoratlari oqibatida vafot etgan.
Izoh (0)