Ўзбекистонда 30 май куни 58 кишида коронавирус аниқланди. ССВ матбуот котиби Фурқат Санаевнинг маълум қилишича, касалланиш ҳолатларининг 33 таси карантин муассасаларида, тўрттаси халқаро юк ташувчи машина ҳайдовчиларида, 21 таси эса аҳоли орасида аниқланган.
Фото: Telegram / @ssvmatbuotkotibi
Қайд этиш жоиз, кун давомида аҳоли орасидан Тошкент шаҳрида 11 кишида, Самарқанд вилоятида саккиз кишида, Наманган вилоятида эса икки кишида касаллик аниқланган.
Айни вақтда, кун давомида 55 бемор соғайиб, реабилитацияга кузатилди. Жумладан, Тошкентда 44 киши, Қорақалпоғистонда икки киши, Самарқанд вилоятида эса тўққиз киши соғайди. Жами соғайганлар сони 2783 нафарга етди.
Ҳозирда 749 нафар бемор даволанишни давом эттирмоқда. Соғлиқни сақлаш вазирлигидан маълум қилишларича, улардан олти нафарининг аҳволи оғир, бир нафарининг аҳволи эса ўта оғир. Эслатиб ўтамиз, ҳозиргача Ўзбекистонда 14 киши коронавирус асоратларидан вафот этган.
