Ўзбекистон ташаббуси билан 1 июнь куни «Тикланиш йўли» халқаро онлайн туризм конференцияси ўтказилади

Ўзбекистон ташаббуси ва Бутунжаҳон туризм ташкилоти бошчилигида коронавирус пандемияси таъсири натижасида туризм соҳасига етказилган зарарларни бартараф этиш масалалари юзасидан 2020 йил 1 июнь куни «Тикланиш йўли» халқаро онлайн туризм конференцияси ўтказилади. Бу ҳақда Туризмни ривожлантириш давлат қўмитаси хабар берди.

Маълум қилинишича, конференция туризм соҳасини жадал тиклаш ва давомий ривожлантириш масалаларида мамлакатлараро ҳамкорликни йўлга қўйиш ва бирдам ҳаракатланиш режаларини муҳокама этиш мақсадида ташкил қилинади.

Қайд этилишича, конференцияни ўтказиш масаласи Ўзбекистон бош вазирининг ўринбосари Азиз Абдуҳакимов ва Бутунжаҳон туризм ташкилоти бош котиби Зураб Пололикашвили ўртасида бўлиб ўтган телефон мулоқоти давомида келишиб олинган.

Тадбирда Марказий Осиё мамлакатлари, шунингдек, Озарбайжон, Арманистон, Грузия, Россия, Беларусь ва Молдова давлатларининг туризм администрациялари раҳбарлари иштирок этиши кутилмоқда.

Мазкур конференция иштирокчилари COVID-19 пандемиясининг туризм соҳасига бўлган салбий оқибатларини юмшатиш бўйича самарали чора-тадбир ишлаб чиқиш юзасидан ўзаро фикр ва тажриба алмашади.

Шу билан бирга, мазкур давлатлар ҳукуматлари томонидан сайёҳлик ва туризм саноатининг жадал қайта тикланиши ва ривожланишини рағбатлантиришга қаратилган саъй-ҳаракатларини бирлаштириш йўллари, пандемиядан кейинги даврда туристлар учун қулай ва хавфсиз шароитларни таъминлаш, шунингдек, туристлар оқимини кўпайтириш ишларини тизимли ташкил этиш масалалари муҳокама қилинади.

Эслатиб ўтамиз, Ўзбекистонда 1 июндан бошлаб «сариқ» ва «яшил» ҳудудларда ички туризм ўз ишини қайта бошлайди. Шунингдек, Президент фармонига асосан туризм соҳасини қўллаб-қувватлаш бўйича бир қатор имтиёз ва имкониятлар белгилаб берилди.