O‘zbekiston tashabbusi va Butunjahon turizm tashkiloti boshchiligida koronavirus pandemiyasi ta’siri natijasida turizm sohasiga yetkazilgan zararlarni bartaraf etish masalalari yuzasidan 2020-yil 1-iyun kuni “Tiklanish yo‘li” xalqaro onlayn turizm konferensiyasi o‘tkaziladi. Bu haqda Turizmni rivojlantirish davlat qo‘mitasi xabar berdi.
Ma’lum qilinishicha, konferensiya turizm sohasini jadal tiklash va davomiy rivojlantirish masalalarida mamlakatlararo hamkorlikni yo‘lga qo‘yish va birdam harakatlanish rejalarini muhokama etish maqsadida tashkil qilinadi.
Qayd etilishicha, konferensiyani o‘tkazish masalasi O‘zbekiston bosh vazirining o‘rinbosari Aziz Abduhakimov va Butunjahon turizm tashkiloti bosh kotibi Zurab Pololikashvili o‘rtasida bo‘lib o‘tgan telefon muloqoti davomida kelishib olingan.
Tadbirda Markaziy Osiyo mamlakatlari, shuningdek, Ozarbayjon, Armaniston, Gruziya, Rossiya, Belarus va Moldova davlatlarining turizm administratsiyalari rahbarlari ishtirok etishi kutilmoqda.
Mazkur konferensiya ishtirokchilari COVID-19 pandemiyasining turizm sohasiga bo‘lgan salbiy oqibatlarini yumshatish bo‘yicha samarali chora-tadbir ishlab chiqish yuzasidan o‘zaro fikr va tajriba almashadi.
Shu bilan birga, mazkur davlatlar hukumatlari tomonidan sayyohlik va turizm sanoatining jadal qayta tiklanishi va rivojlanishini rag‘batlantirishga qaratilgan sa’y-harakatlarini birlashtirish yo‘llari, pandemiyadan keyingi davrda turistlar uchun qulay va xavfsiz sharoitlarni ta’minlash, shuningdek, turistlar oqimini ko‘paytirish ishlarini tizimli tashkil etish masalalari muhokama qilinadi.
Eslatib o‘tamiz, O‘zbekistonda 1-iyundan boshlab “sariq” va “yashil” hududlarda ichki turizm o‘z ishini qayta boshlaydi. Shuningdek, Prezident farmoniga asosan turizm sohasini qo‘llab-quvvatlash bo‘yicha bir qator imtiyoz va imkoniyatlar belgilab berildi.
Izoh (0)