Ўзбекистон Тожикистонга навбатдаги инсонпарварлик ёрдамини юборди, деб хабар бермоқда Asia-Plus.

Қайд этилишича, Шавкат Мирзиёев топшириғи билан коронавирусга қарши кураш доирасида умумий миқдори 19 вагон бўлган гуманитар ёрдам юклари Душанбега юборилди. Ушбу инсонпарварлик ёрдами тиббиёт воситалари ва озиқ-овқатлар, жумладан, 1 000 тоннадан ортиқ ундан иборат.

Ўзбекистон пандемия вақтида Тожикистонга энг кўп гуманитар ёрдам юборган давлат ҳисобланади. Ҳафта бошида қўшни республикага коронавирусга қарши курашда ёрдам учун 24 тонна тиббиёт воситалари юборилганди. Бундан аввал 9 апрель куни ҳам Ўзбекистондан Тожикистонга 18 вагон ун ва тиббиёт воситалари жўнатилган.

Шунингдек, 8 май куни ўзбекистонлик 8 нафар олий тоифали шифокорлар гуруҳи коронавирусга қарши курашда ёрдам бериш учун Тожикистонга борган, 22 май куни қайтиб келишганди. Улар билан бирга қўшни республикага 10 тонна тиббиёт воситалари, жумладан, 10 та сунъий нафас олиш ускунаси юборилган.

Бундан ташқари, Ўзбекистон 144 та тиббий контейнерларни қўшни мамлакатга ёрдам сифатида тақдим этган.

Тожикистонда 29 май ҳолатига кўра, касалланганлар сони 123 кишига кўпайиб, 3686 кишига, инфекциясидан тузалганларнинг умумий сони эса 1769 нафарга етган. Касаллик оқибатида 47 нафар бемор вафот этган.