Хоразм вилояти ХТБ ўқитувчига қилинаётган ноҳақликлар ҳақида тарқалган хабарга муносабат билдирди

Хоразм вилояти халқ таълими бошқармаси блогер Отабек Нуритдинов томонидан Facebook’даги «Коррупция ва ноҳақликлар» гуруҳида қолдирилган постга расмий муносабат билдирди.

Отабек Нуритдинов ўз постида Урганч шаҳридаги 28-сон мактабнинг тасвирий санъат фани ўқитувчиси Албина Низамутдинова номидан ушбу мактабда содир этилаётган ноҳақликлар, қонунбузарликлар бўйича бир қанча маълумотларни эълон қилган.

Аввалроқ мазкур мурожаатда келтирилган маълумотлар бўйича вилоят халқ таълими бошқармаси томонидан расмий муносабат билдирилиб, ишчи гуруҳ томонидан ҳолат ўрганиб чиқилгач, яна маълумот берилиши маълум қилинганди.

Албина Низамутдинова 20 май куни мактаб касаба уюшмаси раиси Л.Сапарова номига Ф.Ибрагимова томонидан унга нисбатан қилинаётган ноҳақликлар юзасидан ёзма мурожаат қилган. 26 май куни эса Ф.Ибрагимова ўқитувчи Албина Низамутдинова билан ўзаро келишмовчилик юзасидан ёзма шаклда Telegram орқали касаба уюшмаси раисига мурожаат қилган.

«Мактаб касаба уюшмаси раиси Л.Сапарова мазкур мурожаатларни ёлғиз ўзи кўриб чиқа олмаслиги, карантин муносабати билан уюшма аъзоларини йиғиш имкони йўқлигини, карантин тугагач кўриб чиқиши ҳақида мурожаатчиларни огоҳлантирган. Сўнгра Урганч шаҳар касаба уюшмаси масъулларидан карантин талабларига риоя қилган ҳолда уюшма аъзоларини ва мурожаатчиларни йиғиши мумкинлиги бўйича ижобий фикр олгач, 27 май куни йиғилиш ўтказишни режалаштирган. Бироқ Албина Низамутдинова мазкур йиғилишга келишни рад қилганлиги сабабли йиғилиш қолдирилган.

Хулоса ўрнида, Урганч шаҳридаги 28-сон мактаб ўқитувчилари Албина Низамутдинова ҳамда Ф.Ибрагимоваларнинг мурожаати юқорида келтирилган сабабларга кўра, ҳозирги кунга қадар мактаб касаба уюшмаси томонидан кўриб чиқишнинг имкони бўлмаганлигини маълум қиламиз», — дейилади муносабатда.

Эслатиб ўтамиз, Отабек Нуритдинов тахаллуси остидаги андижонлик блогер Абдуфатто Нуритдинов шу йилнинг январь ойида туҳмат ва ҳақоратда айбланиб, 15 суткага қамалиб чиққанди. Блогер ўз постларида, асосан, Асака шаҳридаги мансабдорлар фаолиятидаги эҳтимолий коррупцион фактлар, бюджет маблағларини ўғирлаш ва талон-торож қилиш ҳолатлари ҳақида ёзган. Кейинроқ Отабек Нуритдинов Асака туманидаги Холид ибн Валид жоме масжиди яқинида спиртли ичимликлар дўкони очилгани ҳақида пост жойлаганидан сўнг дўкон эгалари томонидан калтакланганди.