Ўзбекистонда карантин чекловлари юмшатилиб, кўпгина ташкилот ва корхоналарга, тадбиркорларга иш юритишга шароит яратиб берилди, аҳолига қулайлик яратиш мақсадида кўчага чиқишга имкон берилди. Бироқ ИИВ матбуот хизматининг маълум қилишича, фуқаролар бундан тўғри хулоса чиқармасдан, коронавирусдан бутунлай халос бўлдик, деган тушунча билан карантин қоидаларига беписанд муносабатда бўла бошлади.
Бозорларда, савдо нуқталарида ижтимоий масофа сақланмаяпти, фуқаролар тиббий ниқобни кўп кунлар, ҳаттоки ҳафталар давомида алмаштирмасдан тақмоқда, кўчага ниқобсиз чиқиш ҳолатлари кузатилмоқда. Транспортда юриш чекловларига риоя этилмаяпти.
Вазирлик одамлар карантин чекловларидан чарчашганини тушунишини, бироқ Ўзбекистонда касалланиш билан боғлиқ айрим рақамларга эътибор қаратиш лозимлигини таъкидлаб, аҳолига видеомурожаат йўллади.
«Бугунги кунга келиб касаллик аниқланган фуқароларимиз сони 3 440 тадан ошди, улардан деярли 20 фоизи ҳали тузалмаганлар, 14 киши вафот этди, 4 киши эса оғир аҳволда. 46 минг 600 дан зиёд фуқаро карантинда қолмоқда. Энг ачинарлиси, биз билган 127 нафар фуқаронинг касаллик юқтирган манбаси ҳанузгача аниқланмаган. Шу билан бирга, касал бўлганини ҳеч кимга билдирмасдан ёки коронавирус инфекциясини юқтирганини билмаган ҳолда уй шароитида даволанган беморлар ҳақида ҳам маълумотлар мавжуд», — дейилади видеомурожаатда.
Шунингдек, охирги вақтларда Тошкент шаҳри, Тошкент ва Самарқанд вилоятларида коронавирус касаллиги аҳоли орасида аниқланаётгани, бу рақамлар ҳар куни кўпайиб бораётгани, охирги икки кунда Тошкент шаҳрининг ўзида уларнинг сони 30 га яқинлашгани, буларнинг барчаси фуқароларнинг гигиена қоидалари ва белгиланган чекловларга беписанд бўлишлари натижаси эканлиги таъкидланди.
«Унутманг, касаллик ташувчи шахслар ўзлари билмаган ҳолда орамизда юриши мумкин. Шунинг учун, аввало, ўзингиз ва яқинларингиз хавфсизлиги учун ниқобсиз юрманг, мақсадсиз кўчага чиқманг, зарурат туғилганда бозор ёки дўконга тушсангиз, ижтимоий масофани қатъий сақланг.
Тартибни сақлаб қолиш бизнинг бурчимиз, огоҳлантириш эса вазифамиздир. Илтимос, сизни жазолашга бизни мажбур қилманг. Ҳеч ким яна бир неча ой уйда ўтиргиси келмаяпти. Вазият бунгача боришига йўл қўймаслик ўз қўлимизда», — деб якунланган вазирлик видеомурожаати.
Эслатиб ўтамиз, Республика махсус комиссиясининг қарори билан амалдаги карантин талаблари 2020 йил 15 июнга қадар узайтирилди. Ўзбекистонда тоифасидан қатъи назар барча ҳудудларда қайси карантин талаблари сақланиб қолиши маълум қилинди. Шунингдек, республикада 1 сентябрга қадар сақланиб қоладиган карантин талаблари рўйхати эълон қилинди.
Изоҳ (0)