Бошқирдистон Соғлиқни сақлаш вазирлиги республиканинг Салават туманида жойлашган Малояз қишлоғида COVID-19 билан касалланиш ҳолатлари аниқланганини тан олди. Касаллик ўчоғи «Горний» иссиқхона комплексида ишлаш учун келган 68 нафар Ўзбекистон фуқароси жойлаштирилган «Сказка» меҳмонхонасида юзага келган, деб хабар беради «Коммерсантъ».
«Горний» — Челябинскдаги «Чурилово» агрохолдинги таркибига кирувчи Уралдаги энг йирик иссиқхона комплекси ҳисобланади. Ўзбекистонлик муҳожирлар бу ерга ишлаш учун февраль ойида келган. Ишчиларни қабул қилувчи томон — Москванинг «Стандарт плюс» компанияси уларни «Сказка» меҳмонхонасига жойлаштирган. Меҳмонхона Челябинск вилояти чегараси яқинида жойлашган.
«Роспотребнадзорнинг Бошқирдистондаги бошқармаси Ўзбекистондан келган 68 нафар ишчининг 53 нафарида COVID-19 аниқланганини маълум қилди. Уларнинг беш нафари Месягутоводаги, уч нафари эса — Кигинскдаги касалхонага ётқизилган. Қолган 45 нафар беморда касаллик енгил ўтмоқда ва улар меҳмонхонада қолган. Меҳмонхонанинг ўзи карантинга олинган», — дейилади хабарда.
Ўзбекистонлик муҳожирларда касаллик белгилари дастлаб 10 май куни пайдо бўла бошлаган. Эртаси куни Роспотребнадзор барча ишчиларни текшириш бўйича кўрсатма берган. 12 май куни иссиқхона ходимлари изоляцияга юборилган: шу куннинг ўзида икки кишида COVID-19 аниқланган. Меҳмонхона карантинга олинган, полиция пости ўрнатилган. 15 май куни Челябинск вилоятига поездда бориб-келган «Сказка»даги яна икки ишчида коронавирус аниқланган.
Маълумотларга кўра, айни вақтда меҳмонхонада 60 киши изоляцияга олинган. Касаллар билан алоқада бўлган 28 нафар республика аҳолиси ўз ўзини изоляциялашга юборилган. Улар орасида меҳмонхона яқинида жойлашган дўконнинг 6 нафар ходими ҳам бор. Ҳозирда беморлар билан алоқада бўлган уч кишига коронавирус тасдиқланган, жумладан, дўкон сотувчисида ҳам.
«Горний» иссиқхона комплексида 550 киши ишлайди. «Агропарк Урал» компанияси раҳбари Евгений Батуриннинг сўзларига кўра, компания ўзбекистонлик муҳожирлар билан 2020 йил охирига қадар шартнома имзолаган.
Изоҳ (0)