Ички ишлар вазирлигининг Йўл ҳаракати хавфсизлиги бош бошқармаси 18 май, душанба куни Фарғона вилоятида одам ўлими билан якунланган учта йўл-транспорт ҳодисаси ҳақидаги репортажни эълон қилди.
Данғарадаги ЙТҲ.
Фото: ЙҲХББ
ЙТҲларнинг иккитаси велосипедчилар ўлими билан, яна бири вояга етмаган боланинг ўлими билан якунланган.
Биринчи ЙТҲ соат 8:40 ларда Ёзёвон тумани Хонобод қишлоғи ҳудудидан ўтган Тошкент—Ўш автомобиль йўлининг 380-километрида юз берган. Isuzu юк машинаси йўлнинг ўнг томонидан ҳаракатланиб бораётган велосипедчига нисбатан эҳтиёткорлик чораларини кўрмаган. Ўз навбатида велосипедчи ҳам автомобиль ҳаракатини кузатмай йўлнинг чап томонига қайрилиб олиши сабабли ЙТҲ юз берган. Велосипед ҳайдовчиси воқеа жойида вафот этган.
Иккинчи ЙТҲ соат 11:30 ларда (аввалроқ ЙҲХББ бу ЙТҲ соат 14:40 ларда юз бергани ҳақида ёзганди) Данғара тумани Қўриқ қишлоғида содир бўлган. 28 ёшли Captiva ҳайдовчиси қатнов қисмини кесиб ўтаётган велосипедчини уриб юборган. 54 ёшли эркак олган тан жароҳатлари туфайли шифохонада вафот этган. Ҳолат юзасидан Жиноят кодексининг 266-моддаси 2-қисми (Одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Учинчи ЙТҲ соат 12:00 ларда (аввалроқ ЙҲХББ бу ЙТҲ соат 14:50 ларда юз бергани ҳақида ёзганди) Ўзбекистон тумани Худоёрхон қишлоғи ҳудудида содир бўлган. 22 ёшли «Жигули» ҳайдовчиси 3 ёшли болани уриб юборган. Ҳодиса оқибатида 3 ёшли ўғил бола шифохонада вафот этган. Ҳолат юзасидан Жиноят кодексининг 266-моддаси 2-қисми (Одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Эслатиб ўтамиз, аввалроқ Тошкент вилоятида бир кунда пиёдалар иштирокида 3 та ЙТҲ содир бўлгани, улардан икки нафари ҳодиса оқибатида вафот этгани хабар қилинганди.
