Россияда бир суткада 8894 киши коронавирусга чалинди, беморларнинг 150 нафари вафот этди

Россияда сўнгги суткада 8 894 киши коронавирусга чалингани қайд этилди. Бу бир кун аввалги кўрсаткичдан 45 кишига кўпдир.

Коронавирусга қарши кураш бўйича тезкор штаб маълумотларига кўра, мамлакатда пандемия бошланганидан буён 326 448 киши коронавирусга чалинди.

Сўнгги суткада касалланганларнинг энг кўпи Москва (2 988 нафар), Москва вилояти (884 нафар), Санкт-Петербург (389) шаҳарларида аниқланган.

Шунингдек, сутка давомида 150 нафар бемор, умумий ҳисобда эса 3 249 нафар бемор вирус қурбони бўлган. Касалланганларнинг 7 144 нафари тузалиб, уларнинг умумий сони 99 825 нафарга етган.

Мамлакатда 3 кундан буён касалланганлар сони 9 минг кишидан ошмаяпти. 21 май куни коронавирусга чалиниш бўйича 8 849 та ҳолат қайд этилган бўлса, 20 майда 8 764 та ҳолат аниқланган.

Россия коронавирусга чалинганлар сони бўйича АҚШдан кейин иккинчи ўринда турибди. Жонс Ҳопкинс маълумотларига кўра, 21 май куни дунёда вирус юқтирганлар сони 5 миллион кишидан ошиб кетган. Worldometer сервисида эса бу кўрсаткич 20 май куни қайд этилганди.