Бразилия коронавирусга чалинганлар сонининг кўплиги бўйича дунё бўйича 3-ўринга чиқиб олди, футбол мамлакати Британияни 4-поғонага тушириб юборди. Бу ҳақда АҚШнинг Жонс Ҳопкинс университети тақдим этган статистик маълумотларда қайд этилган.

Фото: Reuters

Мамлакатда 255 мингтадан кўпроқ касалланиш ҳолатлари кузатилган. Бразилия ҳозирчи бу борада Россия ҳамда АҚШдан ортда қолмоқда. Россияда 299 минг нафар одам касалланган бўлса, АҚШда коронавирусга чалинганлар сони 1,5 миллиондан ҳам кўпроқ. Бразилиядан кейинги ўринлардан Ғарбий Европа мамлакатлари: Испания, Италия, Франция ва Германия жой олган. Дунё бўйича инфекция билан касалланганларнинг умумий сони 4,8 миллион нафардан ошиб кетган.

Бразилия ҳукумати берган маълумотларга кўра, мамлакатда эпидемия бошланганидан бери COVID-19 касаллигидан 16,8 минг киши вафот этган. Ўлим кўрсаткичи бўйича мамлакат дунё давлатлари орасида 5-ўринда жойлашган. Расмий маълумотлар бўйича, бутун дунёда 318,7 минг киши коронавирус инфекцияси оқибатида ҳаётдан кўз юмган.

Мавзуга доир: Бразилияда 99 ёшли уруш фахрийси коронавирусдан тузалди

18 майда бразилиялик тиббиёт эксперти мамлакатда касалланганлар сонининг жадал суръатларда ўсиб бораётганидан хавотирда экани ва рақам 3,5 миллионга чиқиши мумкинлигини билдирган. Унинг фикрича, ҳукумат барча беморларни аниқлаш учун тестларни етказиб бера олмайди.

Мавзуга доир: Бразилияда сутка давомида коронавирусга чалинган ва ундан вафот этганлар сони рекорд даражага етди