Президент Халқ қабулхонаси Сардоба сув омборида юз берган авария оқибатларини бартараф этиш жараёнларидан катта фоторепортаж тақдим этди. Репортажда фалокат оқибатларини бартараф қилиш ишларига турли вазирлик ва идоралардан 20 мингдан зиёд ишчилар ҳамда 3,5 мингга яқин махсус техника жалб этилгани айтилади.
«Сирдарё вилоятининг Оқолтин, Сардоба ва Мирзаобод туманларида сув тошқинидан зарар кўрган 24 та маҳаллада талафот оқибатларини бартараф этиш ишлари амалга оширилмоқда», — дейилади репортажда.
Фотосуратларда ҳарбийлар, ФВВ ходимлари, СЭОМ ходимлари ва бошқа кўнгиллилар томонидан сув тошқинидан талафот кўрган ҳудудларда амалга оширилаётган ишларни кўриш мумкин.
Президент Халқ қабулхонаси репортажни «Сирдарёдаги ‘жанг’ майдонларидан фоторепортаж» деб номлаган. Суратлар Ўзбекистонда нишонланадиган Хотира ва қадрлаш куни байрами ва дунёнинг кўплаб давлатларида нишонланадиган Иккинчи жаҳон урушидаги ғалаба куни арафасида олингани учун ҳам Президент Халқ қабулхонаси талафот оқибатларини бартараф этиш жараёнини жангга қиёслаган бўлиши мумкин. Аммо ушбу жараёндаги бир неча ҳарбийнинг вайроналарни тозалаш вақтида устунни кўтараётган лаҳзаси ҳақиқий жангдаги бир ҳолатни такрорлади.
Гап Иккинчи жаҳон уруши вақтида АҚШ ва Япония аскарлари ўртасида Иводзима ороли учун кечган жанг ҳақида кетмоқда. 1945 йил февраль—март ойларида стратегик жиҳатдан жуда муҳим ҳисобланган Иводзима ороли учун кечган жангларда америкаликларнинг қўли баланд келган. АҚШ армияси оролнинг энг юқори нуқтаси — Сурибати тоғини эгаллаганидан сўнг у ерга АҚШ байроғи ўрнатилган. Беш нафар денгиз пиёда қўшини аскари ва бир нафар денгиз-ҳарбий кучлари санитари томонидан байроқнинг ўрнатилишини Associated Press фотожурналисти Жо Розенталь тарихга муҳрлаган. Бу сурат Иккинчи жаҳон урушидаги энг машҳур суратлардан бирига айланган.
Мана ўша сурат:
Жо Розенталнинг сурати асосида Вашингтон яқинида АҚШ денгиз пиёда корпуси ёдгорлиги ҳам ўрнатилган. Байроқ ўрнатиш билан боғлиқ ҳодисалар Голливуд режиссёри Клинт Иствуднинг «Оталаримизнинг байроғи» (Flags of Our Fathers) фильмида ҳам намойиш этилган.
Иккала суратни солиштирсангиз, Сирдарёда ҳам, Сурибати тоғи чўққисида ҳам вайроналар устидаги ҳарбийлар бир мақсад йўлида ҳаракат қилаётганини кўриш мумкин. Ушбу суратлар бир-бирига қанчалик ўхшашига ўзингиз баҳо беринг.
Изоҳ (0)