2019 йилнинг октябрида Венесуэла мухолифати Американинг Silvercorp хусусий ҳарбий компанияси билан мамлакатга бостириб кириш ва президент Николас Мадурони ҳокимиятдан ағдариш бўйича битим тузишга уринган. Бу ҳақда 42 варақли ҳужжат нусхаларига таяниб, The Washington Post хабар берди.
Шартномада барча тактик ҳаракатлар батафсил изоҳланган, хусусан, қандай портловчи миналар ўрнатилиши ва буюртмани бажаришда қандай махсус воситалардан фойдаланиш ҳақида сўз боради. «Лойиҳанинг бошланғич фазаси» бўлимида буюртманинг умумий қиймати 212,9 миллион долларга баҳоланган.
Ҳужжатда келтирилишича, хизмат кўрсатувчи гуруҳ ўз ҳамкорларига Николас Мадурони қўлга олиш (ҳокимиятдан ағдариш) операцияларини амалга ошириш ва лойиҳалаштириш борасида маслаҳат ва ёрдам бериши, шунингдек, амалдаги режимни йўқ қилиб, Хуан Гуайдони Венесуэла президенти сифати тан олинишини таъминлаши керак бўлган.
Венесуэла томонидан шартномага мухолифат парламенти депутати Серхио Вергара имзо қўйган. Мухолифат етакчиси раҳбари ва ўзининг Венесуэла президенти деб эълон қилган Хуан Гуайдонинг имзоси ҳужжатда йўқ. Бироқ унинг исми мухолифат ва Silvercorp’нинг умумий хизмат кўрсатиш тўғрисидаги 6 саҳифали келишувида қайд этилган.
Апрель ойининг бошларида Николас Мадуро мамлакат ҳимояси учун артиллерияни мобилизация қилганди. Ўшанда у АҚШ ва Колумбия томонидан молиялаштирилаётган қуролли гуруҳлар коронавирус эпидемиясига боғлиқ вазиятдан фойдаланиб, террорчилик акти ва давлат тўнтаришини амалга оширишга тайёргарлик кўраётганини маълум қилган.
Орадан бир ой ўтиб, 4 май куни Венесуэла ҳуқуқ-тартибот органлари мамлакат шимолидаги денгиз ҳудудида колумбиялик жангариларнинг ўрнашишга уринишини бартараф этган эди. Мадуронинг сўзларига кўра, ёлланма жангариларнинг асосий вазифаси уни ўлдириш бўлган.
Мавзуга доир:
Изоҳ (0)