Хитойнинг Xiaomi компанияси Redmi Note 9 смартфонлар сериясининг Японияда сотувга чиқишига бағишланган реклама ролиги учун кечирим сўради, деб хабар беради IXBT.
Роликда тезкор 30 ваттли қувватланиш тасвирланган. Бироқ Xiaomi томошабинлар тасаввурини кучайтириш мақсадида видеога ядровий портлаш тасвирини ҳам қўшишга қарор қилган.
Натижада Xiaomi’нинг Япониядаги вакили кечирим сўрашга мажбур бўлди. Redmi Note 9 сериясини тарғиб қилувчи ролик япон рекламалари учун анъанавий тус олган ақл бовар қилмас тарзда ишланган. Бироқ Xiaomi ҳаддан ошириб юборган. Сюжетга кўра, роликда бош қаҳрамон ишиб кетади ва бақалоқ томни ёриб ҳавога кўтарилиб, ядровий портлашни содир этади.
Эслатиб ўтамиз, «Бақалоқ» — америкаликлар томонидан 1945 йилда Нагасаки шаҳрига ташланган атом бомбасининг шартли номи ҳисобланади.
Xiaomi Twitter ижтимоий тармоғи орқали япон фойдаланувчиларидан кечирим сўраб, хориж бозорига мўлжалланган мазкур рекламада шошқалоқликка йўл қўйилганини таъкидлаган. Компания японларни бутун дунёдаги фойдаланувчилар ва уларнинг маданиятларни ҳурмат қилишига, бундан кейин реклама материалларини яратишда янада кўпроқ эътиборли бўлишга ишонтирган. Компания келажакда бундай ҳолатларнинг олдини олиш учун барча имкониятларни ишга солишга ваъда берган.
Изоҳ (0)