Polshada 10-may kuni o‘tkazilishi rejalashtirilgan prezidentlik saylovlari bekor qilindi. Bu haqda mamlakatdagi hukumron partiya — “Qonun va adolat” yetakchisi Yaroslav Kachinskiy hamda uning koalitsiya bo‘yicha hamkori, “Kelishuv” partiyasi yetakchisi Yaroslav Govinga tayanib, Polsha matbuot agentligi xabar berdi.
“Seym (parlament) spikeri imkoni boricha yaqin vaqt ichida yangi prezidentlik saylovlari haqida e’lon qiladi”, — deyiladi bayonotda. Bayonot mualliflarining ta’kidlashicha, bu kabi qaror “muxolifat tomonidan bu yilgi prezidentlik saylovlarini konstitutsiyada belgilangan muddatda o‘tkazish imkonini beruvchi barcha konstruktiv takliflarni qabul qilishdan bosh tortgani munosabati bilan” qabul qilingan.
Kachinskiy va Govinning so‘zlariga ko‘ra, yangi saylovlarni sirtdan — pochta orqali o‘tkazishga qaror qilingan.
Avvalroq Polsha parlamentining quyi palatasi “Huquq va adolat” partiyasining prezidentlik saylovlarida ovoz berish jarayonlarini masofadan turib o‘tkazish to‘g‘risidagi qonun taklifini qabul qilgandi. 5-may kuni yuqori palata (senat) ushbu qonunni qabul qilmagan. Biroq seym ovozlar soni bo‘yicha senatning vetosini yengishi mumkin.
Eslatib o‘tamiz, Polshaning amaldagi prezidenti Anjey Duda 2015-yilgi saylovlarda 51,55 foiz ovoz to‘plab g‘olib chiqqan edi.
Izoh (0)