Туркманистоннинг Лебоп вилоятида юз берган бўронда кўплаб одамлар жабрланди, ўнлаб кишилар бедарак йўқолди. Улар орасида чўпонлар, «Туркмангаз» ҳайдовчилари ва ишчилари бор, деб хабар бермоқда «Хроника Туркменистана». Шунингдек, 100 бош ва ундан кўпроқ қўйдан иборат бир нечта пода йўқолган.
Тасдиқланмаган маълумотларга кўра, 20 га яқин киши ҳалок бўлган. Turkmen news манбаларининг хабар беришича, 27 ва 28 апрелда Туркманободнинг деярли ҳар бир туманида қурбонлар дафн этилган.
Туркманободда жабрланганлар турли тиббиёт муассасаларига жойлаштирилаётган бўлса, қишлоқ жойларида уларга, ҳаттоки биринчи ёрдам кўрсатишнинг имкони йўқ. Совет давридан қолган фельдшер пунктларида на тиббиёт ходимлар бор, на керакли дори-дармонлар.
Шунингдек, буғдой ҳосили нобуд бўлгани айтилмоқда. Бу эса кузда ун тақчиллигига олиб келиши, одамлар нонсиз қолиши мумкинлигини билдиради.
Вилоят аҳолисининг таъкидлашича, улардан давлат суғуртаси учун доим пул ушлаб қолинган, бироқ ҳозир суғурта тўловлари ҳақида ҳеч қандай гап йўқ. Ҳудудни тиклаш учун аҳоли ойликларининг бир қисми ушлаб қолиниши мумкинлиги тўғрисида миш-мишлар тарқалган.
Эслатиб ўтамиз, Туркманистоннинг бир қатор вилоятларида 27 апрель куни кечаси ёмғир аралаш кучли шамол ёпирилган, улар орасида Лебоп вилояти кўпроқ зарар кўрганди. Ҳодиса оқибатида Лебоп вилоятида алоқа тармоқлари ишламай қолган, мобил телефонларга қўнғироқ қилиш имконияти йўқолган, полиция томонидан Мари ва Лебоп вилоятларини боғловчи йўл ёпиб қўйилган.
Кучли шамол Ўзбекистоннинг Туркманистон билан чегарадош ҳудудларига ҳам етиб борганди. Бухоро, Навоий, Самарқанд ва Қашқадарё вилоятларига 28 апрелга ўтар кечаси ёпирилган шамол тезлиги сониясига 40 метргача етган. Улар орасида, айниқса, Бухоро энг катта талафот кўрган.
Изоҳ (0)