Ўзбекистонда коронавирус тарқалишининг олдини олиш мақсадида халқаро Uzbekistan Airways авиақатновларни жорий йилнинг 30 июнигача тикламаслиги хабар қилинган эди. Компания матбуот хизматининг маълум қилишича, 30 июнга қадар фақат авиачипталар сотиш тўхтатилади.
«Фақат авиачипталар сотишни тўхтатишга қарор қилинган эди, бу карантин 30 июнга қадар узайтирилишини англатмайди. Карантин тугаши ва авиақатновлар тикланиши муддати ҳозирча маълум эмас. Агар карантин чоралари 30 июндан аввалроқ тугатилса, авиақатновлар ҳам, авиачипталар сотиш ҳам тикланади», — дейилади Uzbekistan Airways хабарида.
Қайд этилишича, юк ташишни амалга оширувчи авиақатновлар рейсларни амалга оширишда давом этмоқда. Шу билан бирга, 20 апрелдан бошлаб «Ўзбекистон почтаси» халқаро авиапочта жўнатмаларини юборишни қисман тиклади.
Эслатиб ўтамиз, Шавкат Мирзиёевнинг топшириғига мувофиқ, коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссиясининг қарори билан 30 март куни соат 00:01 дан 20 апрель соат 00:01 га қадар Ўзбекистондаги мавжуд барча аэропортлар ёпилиб, авиақатновлар бутунлай тўхтатилганди.
Республикадаги аэропортлар иш фаолияти ва авиапарвозларнинг қайта тикланиши ёки чеклов чораларининг узайтирилиши Республика махсус комиссияси томонидан эълон қилинади. Ушбу комиссия қарори билан карантин муддати 2020 йил 10 майигача узайтирилган эди.
Изоҳ (0)