Голливуднинг энг оилапарвар актёрлари

Карьера ва шахсий ҳаётни баравар эплай олган юлдузли жуфтликларга ҳавас қилса арзийди. «Яндекс Дзен» платформаси Голливуднинг оилапарвар актёрлари рўйхатини тузди.

Том Хэнкс

«Форрест Гамп», «Яшил маскан» ва бошқа бир қанча кинолардаги маҳоратли роллари билан яхши таниш бўлган Том Хэнкснинг оилапарварлигидан ўрнак олса арзийди. У рафиқаси Рита Уилсонни бир кўришдаёқ севиб қолгани ва у билан ҳаётини боғлашни истаганини таъкидлайди. Жуфтлик турмуш қурганига ўттиз йилдан ортиқ вақт ўтган ва бу йиллар ичида нималар бў​лмаган дейсиз. Том рафиқаси Рита онкологик касалликни бошидан ўтказганида, ўғли гиёҳванд моддага қарам бўлиб қолганида ва бошқа бир қанча вазиятларда оиласи олдида бўлиб, ҳақиқий оила устуни қандай бўлиши кераклигини исботлаган.

Колин Ферт

«Андиша ва ғурур» фильмида ҳақиқий жентельмен жаноб Дарси ролини жонлантирган Колин Ферт турмуш ўртоғини ер юзидаги энг чиройли аёл, деб ҳисоблайди. Жуфтлик бундан 20 йил аввал турмуш қурган ва бугунга қадар асло айрилмаган.

Райан Рейнольдс

Райан Рейнольдснинг рафиқаси Блейк Лайвлига бўлган меҳри бўлакча. Жуфтлик турмуш қурганига 8 йилдан ортиқ вақт ўтган бўлиб, бугунги кунда уч фарзанднинг бахтли ота-онаси. Райан ва Блейкнинг яқин дўстлари улар муносабатида севги-муҳаббат устунлик қилишини таъкидлайди.

Ҳью Жекман

Ҳью Жекман ҳаётини ўзидан 13 ёш катта аёл билан боғлашга қарор қилганида кўпчилик бу муносабатлар узоққа бормаса керак, деб тахмин қилганди. Лекин орадан ўтган 24 йил фикрлар субъектив бўлиши мумкинлигини исботлади. Ҳозирда Ҳью ва Деббора асраб олган икки фарзандини биргаликда тарбиялайди.