Эрон ва унинг иттифоқдошлари Ироқ, Ливан ҳамда Сурияда COVID-19 коронавирус инфекциясига чалинганлар ва ундан вафот этганлар ҳақидаги маълумотларни камайтириш ҳолатлари кузатилмоқда. Бу ҳақда Исроил ташқи разведкаси Моссад раҳбари Йоси Коэн Соғлиқни сақлаш вазирликлари раҳбарларининг брифингида маълум қилган.
«Инфекция ушбу мамлакатларда кенг тарқалган, бироқ улар бу ҳақда ёлғон ахборот бермоқда. Эронда эълон қилинаётган рақамлар ҳақиқатга тўғри келмайди», — дея Коэн сўзларини келтирган Axios портали.
Моссад раҳбарининг айтишича, аслида касалланганлар ва коронавирусдан вафот этганлар сони эълон қилинаётган маълумотлардагидан кўпроқ.
Axios маълумотига кўра, Коэн Исроилда коронавирусга қарши кураш чора-тадбирларидаги асосий шахслардан бири. Бош вазир Биньямин Нетаньяхунинг топшириғи билан Моссад раҳбарига бошқа давлатлардан тиббиёт қурилмалари, ўпкани сунъий нафас олдириш аппаратлари ва коронавирус тестлари жамланмасини олиш бўйича келишувлар тузиш ваколати берилган.
20 апрелда АҚШ президенти Дональд Трамп сунъий нафас олдириш аппаратларини етказиб бериш масалаларини олтита мамлакат етакчилари билан муҳокама қилганини билдирганди. Трамп Эроннинг коронавирусдан жиддий талафот кўрганини ҳам қайд этган. У Теҳрондан бу борада таклиф тушса, Эронга ёрдам беришга тайёрлигини айтган.
«Эрон бу борада ёрдамга муҳтож бўлса, мен уларга кўмак беришга тайёрман. Агар улар бу ҳақда сўраса, албатта», — деган АҚШ давлат раҳбари.
Ўз навбатида Эрон расмийлари Трампнинг коронавирусни даволаш борасидаги маслаҳатларига муҳтож эмаслигини айтиб, доимгидек кескин жавоб қайтарган.
Мавзуга доир:
Изоҳ (0)