Eron va uning ittifoqdoshlari Iroq, Livan hamda Suriyada COVID-19 koronavirus infeksiyasiga chalinganlar va undan vafot etganlar haqidagi ma’lumotlarni kamaytirish holatlari kuzatilmoqda. Bu haqda Isroil tashqi razvedkasi Mossad rahbari Yosi Koen Sog‘liqni saqlash vazirliklari rahbarlarining brifingida ma’lum qilgan.
“Infeksiya ushbu mamlakatlarda keng tarqalgan, biroq ular bu haqda yolg‘on axborot bermoqda. Eronda e’lon qilinayotgan raqamlar haqiqatga to‘g‘ri kelmaydi”, — deya Koen so‘zlarini keltirgan Axios portali.
Mossad rahbarining aytishicha, aslida kasallanganlar va koronavirusdan vafot etganlar soni e’lon qilinayotgan ma’lumotlardagidan ko‘proq.
Axios ma’lumotiga ko‘ra, Koen Isroilda koronavirusga qarshi kurash chora-tadbirlaridagi asosiy shaxslardan biri. Bosh vazir Binyamin Netanyaxuning topshirig‘i bilan Mossad rahbariga boshqa davlatlardan tibbiyot qurilmalari, o‘pkani sun’iy nafas oldirish apparatlari va koronavirus testlari jamlanmasini olish bo‘yicha kelishuvlar tuzish vakolati berilgan.
20-aprelda AQSh prezidenti Donald Tramp sun’iy nafas oldirish apparatlarini yetkazib berish masalalarini oltita mamlakat yetakchilari bilan muhokama qilganini bildirgandi. Tramp Eronning koronavirusdan jiddiy talafot ko‘rganini ham qayd etgan. U Tehrondan bu borada taklif tushsa, Eronga yordam berishga tayyorligini aytgan.
“Eron bu borada yordamga muhtoj bo‘lsa, men ularga ko‘mak berishga tayyorman. Agar ular bu haqda so‘rasa, albatta”, — degan AQSh davlat rahbari.
O‘z navbatida Eron rasmiylari Trampning koronavirusni davolash borasidagi maslahatlariga muhtoj emasligini aytib, doimgidek keskin javob qaytargan.
Mavzuga doir:
Izoh (0)