«Ўзимиздан катта болаларни ютиб қўядиган бўлсак, ўйиндан сўнг калтак ейишимиз аниқ эди» — Луиш Нани болалиги, «Манчестер Юнайтед»га ўтиши ва ўғли ҳақида

Суҳбат аввалида Луиш Нани Лиссабон билан бўлган мустаҳкам алоқаси ҳақида гапиради. Нани Амадорада (Лиссабон ҳудудига кирадиган шаҳар) таваллуд топган. У Португалия пойтахтида футбол учун туғилганди. Бу эса у билан суҳбатнинг бошланиш нуқтаси бўлди.

Болалиги ҳақида

«Ушбу шаҳар менга жасорат ва чексиз диққат-эътибор тақдим қилди. У вақтларда кўчада дўстларимиз билан футбол ўйнаш осон эмасди. Ўзингдан катта ҳамда ёмон болалар билан футбол ўйнаш учун жасорат талаб этиларди. Яхши футбол ўйнай олмаса ҳам бошқалардан кучли ва болаларни қўрқитиб юборадиган ташқи кўринишга эгалар ҳам бўларди. Мободо уларни ўйинда ютиб қўядиган бўлсак, баҳсдан сўнг калтак ейишимиз аниқ эди. Ҳаёт шундай эди», — дейди Нани.

Тақдирга ишониши, ёш дўстини бир кун келиб «Манчестер Юнайтед»да тўп тепишига ишонтира олгани ҳақида

«Ҳа, бу ҳақиқат. Мен ростдан ҳам ўша жамоада биргаликда тўп сурган дўстим билан гаплашдим. Кеч бўлганди. Биз эндигина ўйинни тугатиб, кўчага чиққан вақтимизда, кафедаги телевизорда қўйилаётган учрашувни кўриб қолдик. Бу ажойиб эди. Чемпионлар Лигаси финал беллашувининг сўнгги икки дақиқасида ‘Манчестер Юнайтед’ 2 та гол уриб, ўйин тақдирини ўзгартириб юборди. Дўстимга қарадим ва унга қуйидагиларни айтдим: ‘Бир кун келиб ушбу жамоа сафида ўйнайман ёки ‘Олд Траффорд’да бўламан’. Бу қойилмақом ўйин мени ҳаяжонга солиб қўйганди. Ва бу гаплар ҳақида у ҳеч қачон унутмади. Шундан сўнг биз бир-биримиз билан бир неча йил давомида алоқага чиқмадик. Бироқ учрашган вақтимиз у ҳамон унга берган ваъдам ёдида эканлигини айтди», — дея хотирлайди Луиш.

Қатъиятлилиги ҳақида

Америка футболи мутахассислари фикрига кўра, Нани «Орландо Сити» таркибида майдонга тушган вақтларида ўзига катта масъулият олиши ҳамда қатъиятини намойиш этиши билан бошқалардан ажралиб туради. Португалиялик футболчи футболдаги ҳаётида бундай хусусиятини ўзгартирмасликка кафолат бериб келади.

«Ҳа... Умуман олганда, шу боисдан ҳам мени четлатишди. Мавсумнинг биринчи ўйинини ўтказиб юбораман. Ҳатто ўтган мавсумнинг сўнгги ўйинида ҳам ютқазишни истамаган эдим. Биз ноқулай ҳолатга тушиб қолгандик. Шундай экан, қандай ўйин ҳақида гап кетаётганлигининг менга фарқи йўқ эди. Биз футбол ўйнар эканмиз, клуб логотипи билан фахрланиб, мухлисларга ҳурмат кўрсатган ҳолда ғалаба қозонишимиз лозим. Шу боисдан ўша баҳсда ҳакамдан ғазабландим ва сариқ карточка билан сийландим. Бироқ лига мени янада қаттиқроқ жазолашни лозим деб топди. Охир-оқибатда эса мен ҳам ўз характеримни намойиш этдим. Ҳали-ҳамон ушбу ўйинни яхши кўраман. Ҳамон ғалаба қозонишни истайман. Шунчаки дам олиб футбол ўйнашни хоҳламайман. Менда ҳар доим шундай чегара бор», — дея таъкидлайди португалиялик юлдуз.

Ўғли ҳақида

«Каминани бахтли қилган нарса — ўғлимнинг дунёга келиши. Бу воқеа менга барқарорлик, муҳаббат ва ҳаётнинг ҳар бир жиҳатида ҳаммасига улгуриш имкониятини тақдим этди. Уни ортимда кўриш ва қандай гаплашаётганини гувоҳи бўлиш мен учун ўзгача аҳамиятга эга. Майдонда бўлган вақтим ўзимни энг юқори чўққида ҳис этган бир нечта ҳолатни бошдан ўтказганман. Айниқса ‘Манчестер Юнайтед’даги дастлабки 2 йилим ичида. Ўшанда барча совринларга эга чиққандик. Бу унутилмас лаҳзалар. Бу жуда ажойиб эди. Булар фаолиятимдаги энг муҳим совринлар. Улар берган ҳислар ҳам ўзгача. Шуни аниқ айта оламанки, ўша лаҳзалар фаолиятимдаги энг яхшиларидир», — дейди Нани.

Нани фарзандининг Манчестерда туғилганига қарамай «Спортинг» билан ҳам алоҳида муносабати борлиги ҳақида таъкидлайди.

«Агар ундан сўрасангиз, у ‘Спортинг’, ‘Манчестер Юнайтед’, Португалия ва Орландодан эканлигини айтади. У ҳаммасини яхши кўради. Унда барча жамоанинг либослари бор. Боғга футбол ўйнашга ўтган вақтимизда эса ўша куни қайси формада ўйнашни ўзи танлайди. У ‘Манчестер Юнайтед’ ҳақида ҳамма нарсани билади: клуб, шаҳар унинг учун кўп нарсани англатади. Боиси ўғлим айнан Манчестерда туғилган. У шаҳар билан мустаҳкам алоқа ўрнатган. Аммо ўғлим асосий жамоалар қайси эканлигини яхши билади. ‘Спортинг’, Португалия терма жамоаси, ‘Манчестер Юнайтед’ ва мана энди ‘Орландо Сити’, албатта», — дея суҳбатга якун ясади Нани.

Маълумотнома

Луиш Карлуш Алмейда да Куня (Нанининг тўлиқ исм-шарифи) — 1986 йил 17 ноябрда туғилган. Профессионал футболчилик фаолияти давомида «Спортинг», «Манчестер Юнайтед», «Фенербаҳче», «Валенсия», «Лацио» клубларида тўп сурган. Айни дамда АҚШнинг «Орландо Сити» клуби аъзоси.

Нани «Спортинг» билан Португалия Кубогини 2 бор қўлга киритган. Шунингдек, мамлакат Лига Кубоги мусобақасида 1 марта ғолибга айланган. «Манчестер Юнайтед» сафида 4 карра Англия чемпиони, 2 карра Лига Кубоги соҳиби, 1 бор Чемпионлар Лигаси ғолиби. Шунингдек, 4 марта Англия Суперкубоги соҳиби бўлган. 2008 йилги Клублар ўртасидаги мундиалда ғолиб чиққан.

Португалия терма жамоаси сафида 2016 йилги Европа чемпионатида мусобақа бош совринини қўлга киритган.

Бошқа мақолалар: